މިނިސްޓްރީ އޮފް އިސްލާމިކް އެފެއާޒަށް ގެ ޕާމަނަންޓް ސެކެރްޓަރީގެ މަގާމަށް އަހްމަދު އަދީލް އައްޔަަށް ކޮށްފިއެވެ.
މިނިސްޓްރީން ބުނީ އަދީލަކީ ތައުލީމީ ދާއިރާއަށް 17 އަހަރު ދުވަހު ހިދުމަތް ކޮށްދެއްވާފައިވާ ބޭފުޅެއް ކަމަށެވެ. މިގޮތުން ލީޑިން ޓީޗަރެއްގެ މަގާމާއި ޕްރިންސިޕަލެއްގެ މަގާމުވެސް އަދީލް އަދާކުރައްވާފައިވާ ކަމަށް މިނިސްޓްރީން ވަނީ ފާހަގަ ކޮށްފައެވެ. އަދި މޯލްޑިވްސް ނޭޝަނަލް ޔުނިވާސިޓީއިން ޑިޕްލޮމާ އިން ޓީޗިން އަދި މާސްޓާސް އޮފް އެޑިއުކޭޝަން ހާސިލްކުރައްވާފައި ވާއިރު ވިލާކޮލެޖުން ޕޯސްޓް ގްރެޖުއޭޓް ޑިޕްލޮމާ އިން ޓީޗިންވެސް ފުރިހަމަކުރައްވާފައިވާ ކަމަށް މިނިސްޓްރީން ވަނީ ބުނެފައެވެ.
އަދީލް އެންމެ ފަހުން އަދާކުރައްވާފައި ވަނީ ކ. ގުޅީ ސުކޫލުގެ ޕްރިންސިޕަލްގެ މަގާމު ކަމަށް މިނިސްޓްރީން ބުނެއެވެ.
އާ ޕާމަނަންޓް ސެކްރެޓަރީއަށް މަރުހަބާ ދެންނެވުމުގެ ގޮތުން މިއަދު މުވައްޒަފުންނާއެކު ބޭއްވި ބައްދަލުވުމުގައި މިނިސްޓަރު ވިދާޅުވީ، މިނިސްޓްރީގެ މުވައްޒަފުންނަކީ ގުޅިގެން މަސައްކަތް ކުރާ ބައެއް ކަމަށާއި އަދި މިނިސްޓްރީގެ ޓީމުން ފުރިހަމަ އެއްބާރުލުން ޢަދީލަށް ލިބޭނެ ކަމަށެވެ.
