ކެފޭ އުސޫލުން މަސްތުވާތަކެތި ބޭނުންކުރަން ގެ ދޫކުރި މައްސަލައިގައި ވެރިމީހާގެ ޝަރީއަތް މާދަމާ ކްރިމިނަލް ކޯޓުގައި ތާވާލް ކޮށްފިއެވެ.
އެ މައްސަލައިގައި ދައުލަތުން ދައުވާ އުފުލާފައި ވަނީ މ. ބްރައިޓްފްލާވާ ހުސައިން ޔޫސުފްގެ މައްޗަށެވެ. އަދި އެ މައްސަލައިގެ އަޑުއެހުން މާދަމާއަށް ތާވަލްކޮށްފާ ވަނީ ހެނދުނު 11 ޖަހާއިރަށެވެ.
އެ މީހާގެ މައްޗަށް ކޮށްފައިވަނީ ގާނޫނު ނަންބަރު 17/2011 މަސްތުވާތަކެއްޗާ ބެހޭ ގާނޫނު ގެ 127 ވަނަ މާއްދާގެ (ހ) އާ ހަވާލާދީ، އެ މާއްދާގެ (ށ) ގެ ދަށުން، ގެއެއް ނުވަތަ އިމާރާތެއް ނުވަތަ ގެއަކުން ނުވަތަ އިމާރާތަކުން ބައެއް، ޖަދުވަލު 1 ގައިވާ މަސްތުވާއެއްޗެއް ނުވަތަ ޖަދުވަލު 2 ގައިވާ މަސްތުވާއެއްޗެއް، ޓްރެފިކް ކުރުމަށް ނުވަތަ ޕެޑެލް ކުރުމަށް ނުވަތަ އުފެއްދުމަށް ނުވަތަ އެއިން ކަމެއް ކުރުމަށްކަން ގަބޫލުކުރެވޭ ހާލު، ނުވަތަ އެގޮތަށް ގަބޫލުކުރާނެ ފުރުސަތު އޮވެ، އެ ތަނެއްގެ ވެރިފަރާތުން ނުވަތަ އެތަނެއްގައި އުޅޭ ފަރާތުން ނުވަތަ އެ ތަނެއްގެ މަސްއޫލިއްޔަތު އުފުލާ ފަރާތުން ހުއްދަ ދިނުން ނުވަތަ ހުއްދަ ކުރުމުގެ ކުށުގެ ދައުވާއެވެ.
ހުސައިން ޔޫސުފްގެ މައްޗަށް ދައުވާ އުފުލާފައި ވަނީ އެ ގޭގައި ކެފޭ އުސޫލުން މަސްތުވާތަކެތި ވިއްކައި ވިޔަފާރި ކުރާ ކަމަށް ތުހުމަތު ކުރެވުނު މައްސަލާގައި އެ ގޭގައި މީހުން މަސްތުވާތަކެތި ބޭނުންކޮށް، އެ ތަކެތީގެ ވިޔަފާރިކޮށް، އެ ތަކެތި ޕެޑްލް ކުރާ ކަމަށް ގަބޫލުކުރާނެ ފުރުސަތު އޮވެ، އެކަން ހުއްދަކޮށްފައި ވާތީއެވެ.
އެ މީހާގެ މައްޗަށް ދައުވާކުރަން ޕީޖީއިން ކޯޓަށް ފޮނުވީ ސެޕްޓެންބަރު 2، 2021 ގައެވެ. އަދި މިއީ ކެފޭ އުސޫލުން މާލޭގައި މަސްތުވާތަކެތި ވިއްކާ މައްސަލައިގައި މަސްތުވާތަކެތީގެ ގާނޫނުގެ ދަށުން ގޭގެ ވެރިފަރާތުގެ މައްޗަށް ދައުވާކުރި ފުރަތަމަ ފަހަރެވެ.
