ފުލުހުން ރަސްމީކޮށް ބޮޑީވޯން ކެމެރާ ބޭނުން ކުރަން ފަށައިފިއެވެ.
ބޮޑީވޯން ކެމެރާ ޕްރޮގްރާމް އިފްތިތާހު ކޮށްދެއްވީ އިސްކަންދަރު ކޮށީގައި މިއަދު ބޭއްވި ރަސްމިއްޔާތުގައި އެންވަޔަރަމަންޓް މިނިސްޓަރު އައިމިނަތް ޝައުނާއެވެ.
މި ރަސްމިއްޔާތުގައި ވާހަކަ ދައްކަވަމުން ކޮމިޝަނާ އޮފް ޕޮލިސް މުހައްމަދު ހަމީދު ވިދާޅުވީ ފުލުހުންގެ ބޮޑީ ވޯން ކެމެރާ ފުރަތަމަ ބޭނުން ކުރާނީ މާލެ އާއި އައްޑޫ ސިޓީގައި މަސައްކަތް ކުރާ ފުލުހުން ކަމަށެވެ.
ސީޕީ ވިދާޅުވީ ފުލުހުން ބޮޑީ ވޯން ކެމެރާ ބޭނުން ކުރަން ފެށުމާއިއެކު އާއްމު ރައްޔިތުންނާއި އަދި ފުލުހުންނަށް ވެސް އިތުރު ރައްކާތެރިކަމެއް ލިބިގެން ދާނެ ކަމަށެވެ.
މީގެ އިތުރުން ބޮޑީވޯން ކެމެރާއަކީ ފުލުހުން ޖަވާބުދާރީ ކުރުވުމުގައި މުހިންމު ދައުރެއް އަދާކުރާނެ އެއްޗަކަށް ވާނެ ކަމަށް ވެސް ސީޕީ ފާހަގަކުރެއްވިއެވެ.
ފުލުހުން މީގެ ކުރިން 1400 ބޮޑީ ކެމެރާ ހޯދަން އިއުލާން ކުރި ނަމަވެސް ފަހުން ވަނީ އެ އަދަދު 200 އަށް ބަދަލުކޮށްފައެވެ. އަދި ނިމިދިޔަ އަހަރުގެ ފެބްރުއަރީ މަހުން ފުލުހުން ވަނީ ބޮޑީ ވޯން ކެމެރާ ހަރުކޮށް ޓެސްޓުކުރުމުގެ މަސައްކަތްތަކެއްވެސް ކޮށްފައެވެ.
ފްރަންޓްލައިންގައި ހަރަކާތްތެރިވާ ފުލުހުންގެ ފަރާތުން މިހާރު މަދުން ނަމަވެސް ފެންނަ މައްސަލަތައް ބޮޑީ ވޯން ކެމެރާ ބޭނުން ކުރަން ފެށުމުން ހައްލު ކުރުމަށް ފަސޭހަ ވެގެންދާނެ ކަމަށްވެސް ސީޕީ މީގެ ކުރިން ވަނީ ވިދާޅުވެފައެވެ.
