ބ. ކަމަދޫގައި ނަރުދަމާ ނިޒާމުގެ މަސައްކަތުގެ ތެރެއިން، ހޮޅި އެޅުމުގެ މަސައްކަތުގެ 70 ޕަސެންޓް މަސައްކަތް ނިމިއްޖެއެވެ.
އެމްޑަބްލިއުއެސްސީން ބ. ކަމަދޫގައި ކުރިއަށް ގެންދާ ފެނާއި ނަރުދަމާ ނިޒާމުގެ މަޝްރޫއުގެ ބައްލަވާލެއްވުމަށް ރައީސުލްޖުމްހޫރިއްޔާގެ އޮފީހުގެ މިނިސްޓަރު އަހްމަދު ސަމީރާއި، އެމްޑަބްލިއުއެސްސީގެ މެނޭޖިން ޑިރެކްޓަރު ހަސަން ޝާހުއާއި، ބޯޑު ޑިރެކްޓަރު އިބްރާހިމް އަންވަރު އެކުންފުނީގެ މެނޭޖްމަންޓް ޓީމެ ވަނީ އެ ރަށަށް ވަޑައިގެންފައެވެ.
އެމްޑަބްލިއުއެސްސީން ބުނީ، ކަމަދޫގައި ނަރުދަމާ ނެޓްވޯކް ހޮޅި އެޅުމުގެ މަސައްކަތުގެ 70 ޕަސެންޓަށް އަށްވުރެ ބޮޑު ބައެއް ނިމިފައިވާ ކަމަށާއި މިހާރު ކުރިއަށް ދަނީ އާރްއޯ ފެސިލިޓީ ބިލްޑިން އާއި ބޯހޯލް އެޅުމުގެ މަސައްކަތް ކަމަށެވެ.
އެ މަޝްރޫއުގައި ހިމެނޭ ފެނުގެ ނިޒާމް ގާއިމް ކުރުމުގެ މަސައްކަތުގެ ދަށުން ކަމަދޫގައި 4.38 ކިލޯ މީޓަރުގެ ދިގު ފެން ހޮޅީގެ މައި ނެޓްވޯކް ގާއިމް ކުރުމާއި އާރްއޯ ފެސިލިޓީ ބިލްޑިން އިމާރާތް ކުރުމާއި ފެން އުފެއްދުމަށްޓަކާ 2 އާރްއޯ ޕްލާންޓް ބެހެއްޓުމާއި، ފެން ރައްކާކުރުމަށްޓަކައި 3 ތާންގީ ބެހެއްޓުން ހިމެނެއެވެ. މީގެ އިތުރުން، ގޭގޭގައި ފެންމީޓަރު ބަހައްޓާ، ފެނުގެ ކަނެކްޝަން ގުޅައިދީ، އެ ގެތަކަށް ރައްކާތެރި ބޯފެން ފޯރުކޮށްދިނުން ވެސް ހިމެނެއެވެ.
ކަމަދޫގެ ފެނާއި ނަރުދަމާގެ މަޝްރޫއުއަކީ މިނިސްޓްރީ އޮފް ނޭޝަނަލް ޕްލޭނިން، ހައުސިން އެންޑް އިންފްރާސްޓްރަކްޗާގެ ފަރާތުން އެމްޑަބްލިޔުއެސްސީއާ ހަވާލުކޮށްގެން ކުރިއަށް ގެންދާ މަޝްރޫއެކެވެ. އެމަޝްރޫއުގެ އަގަކީ ޖުމްލަ 56,7 މިލިއަން ދިވެހި ރުފިޔާއެވެ. މި މަޝްރޫއުގެ މުއްދަތަކީ 540 ދުވަހެވެ.
މި މަޝްރޫއުގެ މަސައްކަތް ނިމުމުން ކަމަދޫގެ ރައްޔިތުންނަށް ސާފު ބޯފެނާއި ރައްކާތެރި ނަރުދަމާގެ ނިޒާމެއް ލިބިގެންދާނެ ކަމަށް އެމްޑަބްލިޔުއެސްސީން ބުނެއެވެ.
