ކޮރޮނާވައިރަސް ޑިޒީޒް (ކޮވިޑް-19) ފެތުރުން ކޮންޓްރޯލް ކުރުމަށް ތަންފީޒު ކުރަމުން ދިޔަ ރައްކާތެރި ކަމުގެ ހަރުކަށި ފިޔަވަޅުތައް މުޅިން އުވާލި، ވިލާތުގެ ފުރަތަމަ ގައުމަކަށް ޑެންމާކް ވެއްޖެއެވެ.
ކޮވިޑުން ރައްކާތެރި ވުމަށް ތަންފީޒު ކުރަމުން ދިޔަ ރައްކާތެރި ކަމުގެ ހުރިހާ ފިޔަވަޅުތަކެއް ޑެންމާކުން އުވާލާފައި މި ވަނީ، އިންތިހާ ހަލުވި މިނުގައި ފެތުރެމުން ދާ ކޮވިޑްގެ އާ ވޭރިއަންޓް އޮމިކްރޯންއާއެކު ރެކޯޑް އަދަދުތަކުން ކޭސްތައް އިތުރު ވަމުންވެސް ދަނިކޮށެވެ.
މިހާރުވެސް ޑެންމާކުން ދަނީ ދުވާލެއްގެ މައްޗަށް 40000 އާއި 50000 ދެމެދު އަދަދަކުން ކޮވިޑްގެ އާ ކޭސްތައް ރެކޯޑް ކުރަމުންނެވެ. މިއީ އެ ގައުމުގައި ދިރިއުޅެމުން އަންނަ 5.8 މިލިއަނެއްހާ މީހުންގެ ތެރެއިން 1 ޕަސެންޓް މީހުންނެވެ.
ތަޖުރިބާކާރުން ވިދާޅުވީ، ޑެންމާކުން މިފަދަ ފިޔަވަޅެއް އެޅީ، އެ ގައުމުގައި ވެކްސިން ޖަހާފައި ވާ މީހުންގެ މަތީ އިންސައްތައަށް ބެލުމަށްފަހު، އޮމިކްރޯން ފަދަ "މާ ސީރިއަސް ނޫން" ވޭރިއަންޓަކާ ކުރިމަތިލުމުގެ ގޮތުންނެވެ. އަދި ކޮވިޑް ޖައްސާ ވައިރަހަކީ އިންތިހާ ނުރައްކާތެރި ވައިރަހެއް ކަމުގައި ނުބެލެވޭތީ ކަމަށްވެސް ތަޖުރިބާކާރުން ވަނީ ވިދާޅުވެފައެވެ.
ލިބިފައި ވާ މައުލޫމާތަށް ބަލާއިރު ޑެންމާކުގެ އާބާދީގެ 60 ޕަސެންޓަށް ވުރެ ގިނަ މީހުން މިހާރު ވަނީ ކޮވިޑް ވެކްސިންގެ ބޫސްޓާ ޑޯޒްވެސް ފުރިހަމަ ކޮށްފައެވެ. ވިލާތުގެ އެވަރޭޖު މިންގަނޑަކީ 45 ޕަސެންޓްއެވެ.
ޑެންމާކުގެ ސިއްހަތާ ބެހޭ އިދާރާތަކުން ލަފާ ކުރާ ގޮތުގައި އާބާދީގެ 80 ޕަސެންޓް މީހުން ވަނީ ކޮވިޑް ޖެހި ހާލަތު ސީރިއަސް ވެދާނެ ފަދަ ފައްތަރަކުން ސަލާމަތް ކުރެވިފައެވެ.
އަންގާރަ ދުވަހު ޑެންމާކުން ގެނައި ބަދަލާއެކު، އެތެރޭގެ މާލަންތަކުގައި އެއް ވަގުތެއްގައި އެންމެ ގިނަ ވެގެން ތިބެވޭނެ މީހުންގެ އަދަދު ބަޔާން ކުރާ ހައްދު ބާތިލުވީއެވެ. އަދި ނޭފަތާއި އަނގަމަތި ނިވާ ކުރާ މާސްކު ބޭނުން ކުރުމާ، އެކި ކަހަލަ ހިދުމަތްތަކަށް ވެކްސިން ފާސް ބޭނުން ކުރަން އޮތް އޮތުންވެސް ބާތިލު ކޮށްފައި ވާ ކަމަށް މައުލޫމާތު ލިބެއެވެ.
ކަން މިހެން އޮތް ނަމަވެސް، ބައެއް ކަހަލަ ފިޔަވަޅުތައް ޑެންމާކުން އަދިވެސް މުޅިން އުވާ ނުލާ ކަން ފާހަގަ ކުރަން ޖެހެއެވެ. އެގޮތުން ޝެންގެން އިއްތިހާދުގައި ނުހިމެނޭ ގައުމުތަކުން ޑެންމާކަށް ދަތުރު ކުރާ މީހުންގެ ތެރެއިން ވެކްސިން ނުޖަހާ ތިބި މީޙުންނަށް، އެ ގައުމުގެ ބޯޑަރު އަދިވެސް ބަންދު ކޮށްފައި ވާ ކަމަށް މައުލޫމާތު ލިބެއެވެ.
