މިދިޔަ އަހަރު އޮތް ޔޫރޯ ފުޓްބޯޅަ މުބާރާތުގެ ގްރޫޕް ސްޓޭޖްގައި ފިންލޭންޑާއި ޑެންމާކް ކުޅުނު މެޗުގެ މެދު ތެރެއިން ހިތް ހުއްޓިގެން ދަނޑު މައްޗަށް ވެއްޓުނު ޑެންމާކްގެ މިޑްފީލްޑަރު ކްރިސްޓިއަން އެރިކްސަން އިންގްލިޝް ޕްރިމިއާ ލީގުގެ ބްރެންޓްފޮޑާ ގުޅިއްޖެއެވެ.
ޔޫރޯގެ ކުރިން އިޓަލީގެ އިންޓާ މިލާންއަށް ކުޅެމުން އައި އެރިކްސަން ޖޫން 2020 ގެ ފަހުން އަދި ފުޓްބޯޅަ މެޗެއް ކުޅެފައެއް ނުވެއެވެ. ޔޫރޯ މެޗުގައި ދަނޑުމަތީގައި ލިބުނު އަނިޔާއަށް ފަހު އެރިކްސަން ވަނީ ހިތުގެ އޮޕަރޭޝަނެއްކޮށް ދެން އެފަދަ ގޮތަކަށް ހިތް ހުއްޓުން މެދުވެރި ނުވާނެ ފަދަ ޑިވައިސެއް ހަށިގަނޑަށް ލައްވާފައެވެ.
އިޓަލީ ލީގުގެ އެންމެ ފަހުގެ ޗެމްޕިއަންސް އިންޓާއާ އެރިކްސަންއާ ދެމެދު އޮތް އެއްބަސްވުން މިދިޔަ ޑިސެމްބަރު މަހު ބާތިލުކުރީ ވެސް މި ސަބަބާ ހެދިއެވެ. އެއީ މިފަދަ ޑިވައިސެއް ލައްވާފައިވާ ކުޅުންތެރިން އިޓަލީގެ ލީގުގައި ކުޅުމަށް ލީގުގެ ގަވައިދު ތަން ނުދޭތީއެވެ.
އިންގްލިޝް ޕްރިމިއާ ލީގުގެ ގަވައިދުގައި މިފަދަ ކަމެއް މަނާ ނުކުރާ އިރު ބްރެންޓްފޯޑްގެ ކޯޗު ތޯމަސް ފްރޭންކް ވަނީ އެކްލަބުން އެރިކްސަން ސޮއިކޮށްފައިވާތީ އެކަމަށް މަރުހަބާ ކިޔާފައެވެ.
ފްރޭންކް ބުނީ އެރިކްސަން ފަދަ ދުނިޔޭގެ ފެންވަރުގެ މޮޅު ކުޅުންތެރިއެއް ބްރެންޓްފޯޑާ ގުޅުމަކީ ލިބޭ ވަރަށް ބޮޑު ޝަރަފެއް ކަމަށެވެ.
އުމުރުން 29 އަހަރުގެ އެރިކްސަން 2020 ވަނަ އަހަރު އިންޓާ އާ ގުޅުމުގެ ކުރިން 7 ސީޒަން އިނގިރޭސި ކްލަބް ޓޮޓެންހަމްއާއެކު ހޭދަ ކުރިއެވެ. މިމުއްދަތުގައި އޭނާ ވަނީ ޓޮޓެންހަމްއަށް 305 މެޗު ކުޅެ 69 ލަނޑު ޖަހާ ދީފައެވެ.
އެރިކްސަން ގުޅުނު ބްރެންޓްފޯޑަކީ މިސީޒަންގައި އަލަށް ޕްރިމިއާ ލީގަށް ޕްރޮމޯޓްވި ކްލަބެއް ނަމަވެސް އެޓީމު މިވަގުތު އޮތީ 23 ޕޮއިންޓާއެކު ތާވަލުގެ 14 ވަނައިގައެވެ.
