މާލެ ސަރަހައްދުގައި ހަލުވި ކަމާއެކު އަނެއްކާ ވެސް ކޮވިޑް ފެތުރޭތީ ރައްކާތެރިކަމުގެ ފިޔަވަޅެއްގެ ގޮތުގައި 50 މީހުންނަށް ވުރެ ގިނަ މީހުން އެއް ނުވާން ހެލްތް ޕްރޮޓެކްޝަން އެޖެންސީން އަންގައިފިއެވެ.

ހެލްތް ޕްރޮޓެކްޝަން އެޖެންސީން ބުނީ، ދުނިޔޭގެ ބައެއް ގައުމުތަކުން ފެނިފައިވާ ސަސްކޯވީ-2 ވައިރަސްގެ "އޮމިކްރޯން" ވޭރިއަންޓް ރާއްޖެއިން ފެނިފައި ވާތީ އާއި މާލެ ސަރަޙައްދުގައި ބަލި ފެތުރުން އިތުރުވެފައި ވާތީ، އާންމު ރައްޔިތުންގެ ސިއްހަތާއި ރައްކާތެރި ކަމަށްޓަކައި، ގާނޫނު ނަންބަރު 2021/7 (އާންމު ސިއްހަތު ރައްކާތެރިކުރުމުގެ ގާނޫނު) ގެ 34 ވަނަ މާއްދާގެ ރ އާއި އެ ގާނޫނުގެ 12 ވަނަ މާއްދާގެ ނ ގެ 3 ވަނަ ނަންބަރުގެ ދަށުން ބަލި ފެތުރުން ކޮންޓްރޯލު ކުރުމުގެ ފިޔަވަޅެއްގެ ގޮތުން މާލެ ސަރަހައްދު މާލެ، ހުޅުމާލެ، ވިލިމާލެގައި ރައްކާތެރިވުމުގެ ގޮތުން ފިޔަވަޅުތަކެއް އަޅަން ނިންމާފައިވާ ކަމަށެވެ.

އެގޮތުން 50 މީހުންނަށްވުރެ ގިނަ މީހުން ޖަމާވާ ގޮތަށް ހަފްލާތަކާއި އިވެންޓްތަކާއި އެއްވުންތައް ނުބޭއްވުމަށް އެޗްޕީއޭއިން ވަނީ އަންގާފައެވެ. އަދި 50 މީހުންނަށް ވުރެ މަދުން މީހުން ހިމަނައިގެން ބާއްވާ ހަފްލާތަކާއި އިވެންޓްތަކާއި އެއްވުންތައް ބޭއްވޭނީ ކަނޑައަޅާފައިވާ ރައްކާތެރިކަމުގެ މިންގަނޑުތަކާއި އެޗްޕީއޭގެ ގައިޑްލައިންތަކާ އެއްގޮތަށް ކަމަށް އެޗްޕީއޭއިން ބުނެއެވެ.

ހަމައެއާއެކު މިދުވަސްވަރު މަގުމަތީ ބާޒާރުތައް ނުބޭއްވުމަށާއި، ކުޅިވަރު މުބާރާތްތައް ކުޅިބަލާ މީހުންނަށް ވަދެވޭގޮތަށް ނުބޭއްވުމަށް ވެސް އެވްޕީއޭއިން ވަނީ އަންގާފައެވެ. މި ގޮތަށް އަމަލު ކުރަން ފަށާނީ މާދަމާއިން ފެށިގެން ކަމަށް އެޗްޕީއޭއިން ބުނެއެވެ.

މީގެ އިތުރުން އެ އެޖެންސީން ބުނީ، މި ފިޔަވަޅުތައް ތަންފީޒުކޮށް، އެ ފިޔަވަޅުތަކަށް ފުރިހަމައަށް އަމަލު ކުރުމަށް، އެންމެހައި އިދާރާތަކާއި ފަރާތްތަކަށް އަންގާ ކަމަށެވެ. އަދި މި އެންގުުމާ ގުޅިގެން ދައުލަތުގެ ކަމާބެހޭ މުއައްސަސާތަކުން އަދާކުރަންޖެހޭ ޒިންމާތައް އަދާކުރުމުގެ ގޮތުން އަޅާ ފިޔަވަޅުތަކާއި ދޭ އިރުޝާދުތަކާ އެއްގޮތަށް އާންމުން އަމަލު ކުރުމަށް އެޗްޕީއޭއިން ވަނީ އިލްތިމާސް ކޮށްފައެވެ.

ހަބަރު ކޮވިޑް-19 އެޗްޕީއޭ