މ. މުލަކު މޮނިޓަރިންގައި އޮންނަތާ ދެ މަހަށް ވުރެ ގިނަ ދުވަސް ފަހުން މޮނިޓަރިންގެ ހާލަތުން ނަގައިފިއެވެ.
މުލަކު މޮނިޓަރިން ހާލަތައް ލާފައި ވަނީ އޮކްޓޯބަރު މަހުގެ 20 ވަނަ ދުވަހުއެވެ.
"ދަ ޕްރެސް"އަށް މައުލޫމާތު ދެއްވަމުން މަލުކު ކައުންސިލްގެ މެންބަރު އިބްރާހިމް ނަދީމް ވިދާޅުވީ އެރަށް މޮނިޓަރިން އިން ނަގާފައި ވަނީ މިއަދު ކަމަށާއި ނަމަވެސް ރަސްމީކޮށް އެކަން އެޗްޕީއޭ އިން އަދި އަންގާފައި ނުވާ ކަމަށެވެ.
މުލަކު މޮނީޓަރިންގް ހާލަތުން ނެގުމުން މިހާރު ރާއްޖޭގައި މޮނީޓާރިންގެ ހާލަތުގައި އޮތީ ހަތް ރަށެކެވެ. އެއީ ތ. ތިމަރަފުށި، ގދ. ވާދޫ، ކ. ތުލުސްދޫ، ހދ. ނާވައިދޫ، ދ. ހުޅުދޫ، ކ. މާފުށި އަދި ހއ. އިހަވަންދޫއެވެ.
ރާއްޖޭގައި އަނެއްކާވެސް އަންނަނީ ކޮވިޑުގެ ކޭސްތައް މަތިވަމުންނެވެ.
އިއްޔެ ޖުމްލަ 228 މީހަކު ކޮވިޑުން ޕޮޒިޓިވް ވެފައި ވާއިރު އޭގެ ތެރެއިން 60 މީހަކު ޕޮޒިޓިވްވީ ރަށްރަށުންނެވެ. މާލެއިން 66 މީހުން ޕޮޒިޓިވްވި އިރު ރިސޯޓުތަކުން 97 މީހަކު ވަނީ ޕޮޒިޓިވް ވެފައެވެ.
