އައިޖީއެމްއެޗްގައި މަސައްކަތްކުރި ފިލިޕީންސް ނަރުހެއް ކަމަށްވާ މޭރީ ގްރޭސް މަރާލި މައްސަލާގައި ހައްޔަރުކުރި އޭނާގެ ފިރިމީހާ މާވިންގެ ދިވެހި ލޯބިވެެރިޔާ، ހަލީމަތު ލަމްހާ އަބްދުއްރަހުމާންގެ ބަންދުގެ މުއްދަތު އިތުރު ކޮށްފިއެވެ.
މޭރީ މަރާލި މައްސަލާގައި ލަމްހާ ހައްޔަރު ކުރީ މިދިޔަ މަހުގެ 16 ގައެވެ. އަދި 17 ވަނަ ދުވަހު ކްރިމިނަލް ކޯޓުން ވަނީ އޭނާގެ މައްޗަށް 15 ދުވަހުގެ ބަންދެއް ޖަހާފައެވެ.
މިއަދަށް އެ ބަންދުގެ މުއްދަތު ހަމަވެފައި ވާއިރު، ލަމްހާގެ ބަންދަށް 15 ދުވަސް އިތުރު ކޮށްފައިވާ ކަމަށް ފުލުހުން ބުންޏެވެ.
ފިލިޕީންސަށް ނިސްބަތްވާ، އައިޖީއެމްއެޗްގެ ޑައަލިސިސް ޔުނިޓުގައި މަސައްކަތް ކުރާ މޭރީ ގްރޭސް ދަންޖެހިގެން މަރުވިކަން ސޯޝަލް މީޑިއާގައި މިދިޔަ އޮކްޓޯބަރު މަހު ވަނީ ރިޕޯޓު ކޮށްފައެވެ. ނަމަވެސް ޕޯސްޓްމޯޓަމް އިން ދައްކާ ގޮތުގައި އޭނާ މަރުވީ ބޮލަށް ލިބުނު ބޮޑެތި ޒަހަމްތަކާ ގުޅިގެން ކަމަށް ފުލުހުން މީގެ ކުރިން ބުންޏެވެ.
މޭރީ ގްރޭސް އަކީ ކައިވެނި ކޮށްގެން ދަރިއެއް ވެސް ހުންނަ މީހެކެވެ. އަދި އޭނާގެ ފިރިމީހާ ވެސް މަސައްކަތް ކުރަނީ އައިޖީއެމްއެޗްގެ އީއާރްގައި ނަރުހެއްގެ ގޮތުގައެވެ. މައުލޫމާތު ލިބިފައިވާ ގޮތުގައި އެ ނަރުސް މަރުވެފައި އޮއްވާ ފެނިފައި ވަނީ އޭނާގެ ފިރިމީހާއާ ދިމާވި މައްސަލައަކަށް ފަހުއެވެ.
އެ މައްސަލައާ ގުޅިގެން، އޭނާގެ ފިރިމީހާ މާވިން ގްރޭސް ހައްޔަރު ކުރީ، މިދިޔަ އޮކްޓޯބަރު މަހުގެ 27 ގައެވެ.
