މަސްތުވާތަކެތި ނައްތާލާ މަންޒަރު ބަލަން ބޭނުންވާ މީހުންނަށް ފުލުހުން އެ ފުރުސަތު ހުޅުވާލައިފިއެވެ.
ފުލުހުން ބުނީ، މަސްތުވާތަކެތީގެ އެކި މައްސަލަތަކުގައި ޑްރަގް އެންފޯސްމެންޓް ޑިޕާޓްމަންޓުގެ ބެލުމުގެ ދަށަށް ގެންގޮްސްފައިވާ 314 ކިލޯގެ މަސްތުވާތަކެތި ނައްތާލުމުގައި އޮބްޒާވަރުންގެ ގޮތުގައި ބައިވެރިވާން ބޭނުންވާ މީހުންނަށް އެ ފުރުސަތު ހުޅުވާލާފައިވާ ކަމަށެވެ.
އޮބްޒާވަރުންގެ ގޮތުގައި ބައިވެރިވާން ބޭނުން މީހުން ނަންނޯޓު ކުރުމަށްޓަކައި މިއަދު މެންދުރުފަހު 3:00 އާ ހަމައަށް ފުރުސަތު ވަނީ ހުޅުވާލާފައެވެ.
މަސްތުވާތަކެތި ނައްތާލުމުގެ މަސައްކަތް ކުރިއަށް ގެންދަން ރާވާފައި ވަނީ މާދަމާ ހެނދުނު ދޫނިދޫގައެވެ.
ފުލުހުން 314 ކިލޯގެ މަސްތުވާތަކެތި ނައްތާލަން ނިންމާފައި ވާއިރު ވޭތުގެ ދިޔަ 4 މަހެއްހާ ދުވަހުގެ ތެރޭގައި 1000 ކިލޯއަށް ވިރެ ގިނަ އަދަދެއްގެ މަސްތުވާތަކެތި ވަނީ އަތުލާފައެވެ. ބައެއް މައްސަލަތައް ޝަރުއީ މަރުހަލާގައި އޮތް އިރު ބައެއް މައްސަލަތަކުގައި ހިމެނޭ އެންމެން ވަނީ ހެކި ނެތިގެން، ނުވަތަ ބަންދުގައި ބަހައްޓަން ޖެހޭ ސަބަބެއް ނެތިގެން ދޫކޮށްލާފައެވެ.
މަސްތުވާތަކެތީގެ މައްސަލަތައް ރާއްޖޭގައި އިންތިހާއަށް ބޮޑުވެފައި ވާއިރު، ދައުލަތުގެ މުއައްސަސާތައް ވަނީ މައްސަލަ ހައްލު ކުރުމަށް ނުކުޅެދިފައެވެ. މަސްތުވާތަކެތި ރާއްޖެއަށް އެތެރެވުން ނުހުއްޓުވޭ އިރު، މަސްތުގެ ހާލުގައި ތިބޭ މީހުންނަށް ރަނގަޅު ފަރުވާއެއް ނުދެވެއެވެ.
