މިދިޔަ އޮކްޓޯބަރު މަހު ސަފާރީއެއްގައި ރާއްޖެއަށް އެތެރެކޮށް، ފަޅު ރަށެއް ކަމަށްވާ އދ. ބޮޑުކާށިހުރާގައި ފޮރުވާފައި ހުއްޓާ ފެނުނު 100 ކިލޯގެ މަސްތުވާތަކެތީގެ މައްސަލާގައި ބަންދުގައި ތިބި ދެ ބިދޭސީންގެ ބަންދަށް 30 ދުވަސް އިތުރު ކޮށްފިއެވެ.
މިދިޔަ އޮކްޓޯބަރު 13 ވަނަ ދުވަހު 10 މީހަކު ހައްޔަރު ކުރި މި އޮޕަރޭޝަންގައި މިހާރު ބަންދުގައި ތިބީ ބަންގްލާދޭޝްގެ ދެ މީހަކު އެކަންޏެވެ. އެއީ އެމްޑީ ރަފީގުލް އިސްލާމް، 35، އަދި ޑީއެމް މޮބިން، 24، އެވެ.
ސަފާރީއެއްގައި ވަޒީފާ އަދާކުރާ މޮބިން ކޯޓުގައި ބުނެފައިވަނީ މަސްތުވާތަކެއްޗާ އޭނާއާ އެއްވެސް ގުޅުމެއް ނެތް ކަމަށެވެ. ސަފާރީގައި ތިބި ބަޔަކު އެކަން ކޮށްފައިވަނީ ވެސް އޭނާއަށް އެނގިގެން ނޫންކަމަށް ތަހުގީގުގައި ބުނެފައިވެއެވެ. ނަމަވެސް ދައުލަތުން ހުށަހެޅި ހެކިތަކުން ތުހުމަތު ކުރެވޭ މިންވަރަށް އެކަށީގެންވާ ހެކި ލިބިފައި ވާއިރު އެ ހެކިތައް ނަފީވާނެ ފަދަ ހެއްކެއް މޮބިންއާ އެއްކޮޅަށް ނެތް ކަމަށް ކޯޓުގެ ނިންމުމުގައި ވެއެވެ. އޭނާއަކީ ސައްހަ ވިސާގައި ރާއްޖޭގައި އުޅޭ މީހެކެވެ.
ރަފީގުލް އިސްލާމަށް ސްޕޮންސާ އާއި ވަޒީފާ ހަމަޖެއްސުމަށް މަސައްކަތް ކުރަމުން ގެންދާކަން އެނގޭ ލިޔުމެއް ދިފާއީ ވަކީލުން ހުށަހަޅާފައިވެ އެވެ. އެ ލިޔުމަށް ބަލާއިރު ރަފީގުލް އިސްލާމް އަތުގައި ސައްހަ ޕާސްޕޯޓަކާއި ވިސާއެއް ނެތްއިރު ގަވައިދުގެ ތެރެއަށް ވަނުމަށް ހުށަހަޅާފައި ނުވެއެވެ. މީގެ އިތުރުން އޭނާގެ ކުޑަކަމުދާ ތަކެތި ކެނެބިސްއަށް ޕޮޒިޓިވް ވެފައި ވެއެވެ.
އެ މައްސަލާގައި 10 މީހުން ހައްޔަރު ކުރި އިރު އޭގެ ތެރެއިން ދެ މީހަކު ވަނީ މައްސަލަ ކޯޓަށް ވަނުމާއެކު ދޫކޮށްލާފައެވެ. އެހެން ކަމުން ބާކީ ތިބި 8 މީހުންނަށް ބަންދުގެ މުއްދަތު ޖެހިއެވެ. އޭގެ ފަހުން 5 ދިވެހިން ވަނީ ދޫކޮށްލާފައެވެ.
އެހެންނަމަވެސް މިދިޔަ ހޯމަ ދުވަހު ޕީޖީއިން ވަނީ މި މައްސަލައިގާ ހިމެނޭ 10 މީހުންގެ މައްޗަށް ދައުވާކުރަން ފޮނުވާފައެވެ. އޭގެ ތެރޭގައި އެ ތަކެތި ރާއްޖެއަށް އެތެރެކުރުމުގައި އިސްކޮށް އުޅުނުކަމަށް ފުލުހުން ތުހުމަތުކުރާ މ. ކޮޅުފުށި، ޒަހީރާމަންޒިލް، އަހުމަދު ސިރުހާން ޝަމީމް އަދި ކ. މާފުށީ، ސްވީޓްމީޑް، އަހުމަދު މާހިރު ވެސް ހިމެނެއެވެ.
މަސްތުވާތަކެއްޗާ ބެހޭ ގާނޫނުގެ 17/2011 ގެ 114 ވަނަ މާއްދާގެ ދަށުން، ޑައިމޯފިން ބޭނުންކުރުމުގެ ކުށުގެ ދައުވާ އާއި އެ ގާނޫނުގެ 105 ވަނަ މާއްދާގެ ދަށުން ޑައިމޯފިން ޓްރެފިކްކުރުމުގެ ކުށުގެ ދައުވާ ދ. ބަނޑިދޫ، ޕޮލަރިސް، މުހައްމަދު ހުސައިންގެ މައްޗަށް ވަނީ އުފުލާފައެވެ.
މަސްތުވާތަކެތީގެ ގާނޫނުގެ 17/2011 ގެ 105 ވަނަ މާއްދާގެ ދަށުން، ޑައިމޯފިން ޓްރެފިކްކުރުމުގެ ކުށުގެ ދައުވާ އާއި ގެ 115 ވަނަ މާއްދާގެ ދަށުން، ކެނެބިސް ބޭނުންކުރުމުގެ ކުށުގެ ދައުވާ އުފުލާފައިވަނީ ނ. ވެލިދޫ، ބީޗްހެވަން، ޖުމާން މުސްތަފާ އަށާއި ލ. ކަލައިދޫ، ޖަނަވަރީމާގެ، މުހައްމަދު އަހްމަދު އަދި ބަނގްލަދޭޝް ރައްޔިތެއްކަމަށްވާ އެމްޑީ ރަފީގުލް އިސްލާމުގެ މައްޗަށެވެ.
ހދ. ކުމުންދޫ، ޑިއާފުރެންޑް، އިބްރާހީމް ސިނާނު އާއި ގއ. ކޮލަމާފުށި، ސޯސަންގެ، އިބްރާހީމް ޒާއިދު ހަބީބަށާއި މާފުށި، ސްވީޓްމީޑް، އަހްމަދު މާހިރު އަދި ބަނގްލަދޭޝް ރައްޔިތެއްކަމަށްވާ ޑީއެމް މޮބިންގެ މައްޗަށް މަސްތުވާތަކެތީގެ ގާނޫނުގެ 17/2011 ގެ 105 ވަނަ މާއްދާގެ ދަށުން، ޑައިމޯފިން ޓްރެފިކްކުރުމުގެ ކުށުގެ ދައުވާ އުފުލައިފާވާއިރު ޑައިމޯފިން ޓްރެފިކްކުރުމުގެ ކުށުގެ ދައުވާ އާއި ގެ 115 ވަނަ މާއްދާގެ ދަށުން، ކެނެބިސް ބޭނުންކުރުމުގެ ކުށުގެ ދައުވާ އުފުލާފައިވަނީ ގއ. ދެއްވަދޫ، ދޭލިޔާގެ، މިދުޙަތު އިބްރާހީމަށާއި މ. ކޮޅުފުށި، ޒަހީރާމަންޒިލް، އަޙްމަދު ސިރުޙާން ޝަމީމްގެ މައްޗަށެވެ.
އޮކްޓޯބަރު 13 ގައި 100 ކިލޯގެ މަސްތުވާކެތި އަތުލައިގެންފައިވާއިރު، އޭގެ އެއް ދުވަސް ކުރިން ފުލުހުން ވަނީ 215 ކިލޯގެ މަސްތުވާތަކެއްޗާއެކު ދެ މީހަކު ހައްޔަރުކޮށްފައެވެ. އެ މައްސަލާގައި ހައްޔަރުކުރި ދެ މީހުންވެސް ވަނީ ޝަރީއަތް ނިމެންދެން ބަންދުކޮށްފައެވެ.
