ނިޝާން އިއްޒުއްދީނުގެ އިއްޒަތުގެވެރިޔާ އަދި ކުރީގެ މިނިސްޓަރު އުމަރު ޒާހިރު މިއަދު އަވަހާރަ ވުމާ ގުޅިގެން ގައުމީ ދިދަ މާދަމާއިން ފެށިގެން ތިން ދުވަހަށް ބައިދަނޑިއަށް ތިރިކުރަން ސަރުކާރުން ނިންމައިފިއެވެ.

ރައީސް އޮފީހުން ބުނީ، މިގޮތަށް ހަމަޖެއްސެވީ ރައީސުލްޖުމްހޫރިއްޔާ އިބްރާހިމް މުހައްމަދު ސޯލިހް ކަމަަށެވެ. އެހެންކމަުން މާދަމާއިން ފެށިގެން މި ހަފްތާގެ ބުރާސްފަތު ދުވަހުގެ ނިޔަލަށް ގައުމީ ދިދަ ހުންނާނީ ބައިދަނޑިއަށް ތިރިކޮށްފައެވެ.

އުމަރު ޒާހިރު މިއަދު އަވަހާރަވީ ކޮވިޑްގެ ބަލީގައި އާލށްވެއުޅުއްވާއި ދަރުމަވަންތަ ހޮސްޕިޓަލުގައި ފަރުވާ ދެމުން ދަނިކޮށެވެ. އުމަރު ޒާހިރު އަވަހާރަވީ އިރު އޭނާގެ އުމުރުފުޅަކީ 85 އަހަރެވެ.

މައުލޫމާތު ލިބިފައިވާ ގޮތުގައި އުމަރު ޒާހިރު ކޮވިޑަށް ޕޮޒިޓިވް ވެފައި ވަނީ މިމަހު 11 ވަނަ ދުވަހުއެވެ. އޭގެ ކުރިން އެމަނިކުފާނު ވަނީ އަމިއްލަފުޅު ހަރަދުގައި ފުވައްމުލަކުގައި އެޅުއްވި މިސްކިތް ހުޅުއްވުމަށް އެ ރަށަށް ދަތުރުފުޅެއް ވެސް ކުރައްވާފައެވެ. އެ ދަތުރުފުޅަށް ފަހު އުމަރު ޒާހިރު އާލާސްކަންފުޅާ އުޅުއްވިއެވެ. އަދި އިތުރަށް ހާލުކޮޅު ގޯސްވުމުން އުމަރު ޒާހިރަށް ގެންދެވީ ދަރުމަވަންތަ ހޮސްޕިޓަލްގައި ފަރުވާ ހޯއްދަވަމުންނެވެ.

1950 ވަނަ އަހަރުގެ ތެރެއިން ފެށިގެން ގައުމީ ހިދުމަތް ކޮށް ދެއްވުމުގައި އުމަރު ޒާހިރު މެދުކެނޑުމެއް ނެތި ވަނީ މަސައްކަތްޕުޅު ކުރައްވާފައެވެ. އެގޮތުން އައްޑޫ ގަމުގައި ހުންނަވާ ދިވެހި ސަރުކާރުގެ ލޭޒަން އޮފިސަރުކަމާއި ދާހިލިއްޔާގެ އެކިއެކި ވަޒީފާތަކާއި މަޖީދިއްޔާގެ ހެޑްމާސްޓަރު ކަމާއި ރޭޑިއޯ މޯލްޑިވްސްގެ ވެރިޔާގެ މަގާމުވެސް އުމަރު ޒާހިރު ވަނީ ފުރުއްވާފައެވެ. މީގެ އިތުރުން އެޑިއުކޭޝަން މިނިސްޓްރީގެ ނާއިބު ކަމާއި ހޯމް މިނިސްޓްރީގެ ނާއިބު ކަމުގެ މަގާމުގައި ވެސް އުމަރު ވަނީ މަސައްކަތް ކުރައްވާފައެވެ.

އުމަރު ޒާހިރަކީ ރައީސް މައުމޫންގެ ވެރިކަމުގައި އެންމެ ހިދުމަތްތެރި އެއް ވަޒީރެވެ. އެމަނިކުފާނު ވަނީ 1983 ވަނަ އަހަރުން 1988 ވަނަ އަހަރާ ހަމަޔަށް ހޯމް މިނިސްޓަރު ކަމުގެ މަގާމު ފުރުއްވާފައެވެ. އެއަށް ފަހު 1993 ވަނަ އަހަރާ ހަމައަށް އުމަރު ޒާހިރު ވަނީ މިނިސްޓާ އޮފް ހޯމް އެފެއާޒް އެންޑް ސްޕޯޓްސްގެ މަގާމު ފުރުއްވާފައެވެ.

1950 އިން ފެށިގެން ގައުމަށް ގިނަ ހިދުމަތްތަކެއް ކޮށްދެއްވާފައި ވާތީ، އުމަރު ޒާހިރު ކޮށްދެއްވި ހިދުމަތްތަކުގެ އަގު ވަޒަން ކުރުމުގެ ގޮތުން ސަރުކާރުން ވަނީ ނިޝާން އިއްޒުއްދީނުގެ ޝަރަފު އެމަނިކުފަނަސް އަރުވާފައެވެ.