ގައުމީ އެއާލައިން ހިންގާ އައިލެންޑް އޭވިއޭޝަން (އައިއޭއެސް)އަށް 99.6 މިލިއަން ރުފިޔާގެ ގެއްލުން ވެއްޖެއެވެ.

ސަރުކާރު ހިއްސާވާ ކުންފުނިތަކުގެ ކަންތައް ބަލަހައްޓާ ޕްރައިވަޓައިޒޭޝަން އެންޑް ކޯޕަރަޓައިޒޭޝަން ބޯޑު (ޕީސީބީ) އިން އާންމުކުރި 2021 ވަނަ އަހަރުގެ ދެވަނަ ކުއާޓާގެ މާލީ ހިސާބުތައް ދައްކާގޮތުގައި މޯލްޑިވިއަން އަށް މިއަހަރުގެ ދެވަނަ ކުއާޓާގައި 99.6 މިލިއަން ރުފިޔާގެ ގެއްލުން ވެފައި ވަނީ އާމްދަނީ މަދުވުމާއި ހިންގުމުގެ ހަރަދު ބޮޑުވުމުގެ ސަބަބުންނެވެ.

މިގޮތުން ދެވަނަ ކުއާޓާގައި ލިބުނު އާމްދަނީ 28 ޕަސަންޓު ދަށްވެފައި ވާއިރު ހިންގުމުގެ ހަރަދު ވަނީ 23 ޕަސެންޓް އިތުރުވެފައެވެ.

މިއަހަރުގެ ދެވަނަ ކުއާޓާގައި ހިންގުމުގެ ހަރަދުގެ ގޮތުގައި 117.7 މިލިއަން ހޭދަކޮށްފައި ވާއިރު އޭގެ ތެރޭގައި އިދާރީ ކަންކަމަށް 117.6 މިލިއަން ރުފިޔާ އާއި މާކެޓިންއަށް 1 ލައްކަ ރުފިޔާ ހިމެނެއެވެ.

މިއަހަރުގެ ފުރަތަމަ 3 މަހު 25.3 މިލިއަން ރުފިޔާ ގެއްލުން ވެފައި ވާއިރު މިދިޔަ އަހަރުގެ ދެވަނަ ކުއާޓާގައި ލިބުނު ގެއްލުން 110 މިލިއަން ރުފިޔާއަށް ވަނީ އަރާފައެވެ.

މި އަހަރުގެ ފުރަތަމަ 6 މަސް ދުވަހު އައިއޭއެސްއަށް 124.9 މިލިއަން ރުފިޔާގެ ގެއްލުން ވަނީ ލިިބިފައެވެ.

އައިއޭއެސް ބަނގުރޫޓުވުމާ ގާތްވެފައި ވާއިރު ރައީސް އިބްރާހިމް މުހައްމަދު ސޯލިހް ވަނީ މޯލްޑިވިއަން އަކީ ކުރިންވެސް ގެއްލުމުގައި ހިންގަމުން އައި ކުންފުންޏެއް ކަމަށާއި އަދި ކޮވިޑުގެ ސަބަބުން ކުރިމަތިވި އިގްތިސޯދީ ހީނަރުކަމުގެ ތެރޭގައި އެ ކުންފުނީގެ އިގްތިސޯދީ ހާލަތު އިތުރަށް ރަނގަޅުނުވާ ކަމަށް ވިދާޅުވެފައެވެ. ކުންފުނީގެ މާލީ ހާލަތު ވަރަށް ބޮޑަށް ގޯސްފައި ވާއިރު، އަދި އެ ކުންފުނީގައި ތިބި ތަޖުރިބާކާރު ގިނަ ބަޔަކު ކުންފުނި ދޫކޮށްފައި ވާތީ ކުންފުނީގެ މާލީ ހާލަތު ރަނގަޅު ކުރުމަށްޓަކައި ޖޮއިންޓް ވެންޗާ ކުންފުންޏެއް އުފެއްދުމަށް ބޭރުގެ ފަރާތްތަކާ މަޝްވަރާ ކުރަމުން އަންނަ ކަމަށް ރައީސް ވިދާޅުވިއެވެ.

މީގެ އިތުރުން ރައީސް ވަނީ ރާއްޖޭގައި ގައުމީ އެއާލައިނެއް އޮންނަން ޖެހޭ ކަމަށާއި ސަރުކާރުން ސަބްސިޑީ ދީގެން ވެސް ގައުމީ އެއާލައިން ދަމަހައްޓަން ޖެހޭ ކަމަށް ވިދާޅުވެފައެވެ. ޖޮއިންޓް ވެންޗާއެއް ހެދުމުގެ ބޭނުމަކީ ބޭރުގެ ދަތުރުތަކުން ލިބޭ އާމްދަނީ އިތުރުކުރުން ކަމަށް ރައީސް ވިދާޅުވެފައި ވެއެވެ.

ހަބަރު މޯލްޑިވިއަން