މާދަމާއިން ފެށިގެން މިމަހުގެ ނިޔަލަށް ކްރިމިނަލް ކޯޓު ރިސެސްއަށް ދިއުމަށް ނިންމައިފިއެވެ.
ކްރިމިނަލް ކޯޓުން ބުނީ މި މުއްދަތުގެ ތެރޭގައި ކުރިއަށް ގެންދިއުމަށް ހަމަޖެހިފައިވަނީ ކޮންމެހެން ބާއްވަންޖެހޭ ހާއްސަ ޝަރީއަތްތަކުގެ އަޑުއެހުންތައް އެކަނި ކަމަށެވެ.
ނަމަވެސް، ކުށުގެ ތުހުމަތުގައި ހައްޔަރު ނުވަތަ ބަންދުކުރެވޭ ފަރާތްތަކުގެ ބަންދާމެދު ގޮތެއް ނިންމުމަށް ބާއްވާ މަޖިލިސްތައް ބޭއްވުމާއި ތަހްގީގުކުރާ އިދާރާތަކުން އެދިގެން ނެރެދޭ އަމުރުތައް ނެރުމުގެ މަސައްކަތްތައް ކުރިއެކޭ އެއްގޮތަށް ކުރަމުން ގެންދާނެ ކަމަށް އެ ކޯޓުން ވަނީ ބުނެފައެވެ.
އަހަރަކު ދެފަހަރު ކޯޓްތައް ރިސެސްއަށް ދާއިރު، ޑިސެމްބަރު މަހަކީ ކޯޓްތައް ދެވަނަ ފަހަރަށް ރިސެސްއަށް ދާ މުއްދަތެވެ. ނަމަވެސް މިއަހަރުގެ ދެވަނަ ބުރުގައި ރިސެސްއަށް ނުދިއުމަށް ސިވިލް ކޯޓާއި ޑްރަގް ކޯޓުގެ ފަނޑިޔާރުންގެ މަޖިލީހުން ވަނީ ނިންމާފައެވެ.
ޑްރަގް ކޯޓާއި ސިވިލް ކޯޓް ރިސެސްއަށް ނުދިއުމަށް ނިންމި ނަމަވެސް ސުޕްރީމް ކޯޓު މިހާރުއޮތީ ރިސެސްގައެވެ. އަދި ފެމިލީ ކޯޓު މާދަމާ އިން 31 އޮންނާނީ ރިސެސްގައި ކަމަށް އެކޯޓުން ބުނެއެވެ.
