އެންމެ ފަހުން ސިޓީ ކައުންސިލުން ހުޅުމާލޭގެ ރަޖިސްޓްރީ ބާތިލްކޮށްފިއެވެ.
މިއަދު ކައުންސިލުން ކުރިއަށް ގެންދިޔަ ބައްދަލުވުމުގައި ހުޅުމާލޭގެ ރަޖިސްޓްރީ ބާތިލްކުރުމަށް ހުށަހެޅުއްވީ ޑެޕިއުޓީ މޭޔަރު އަހުމަދު ނަރީޝެވެ.
ނަރީޝްގެ ހުށަހެޅުން ކައުންސިލުން ފާސްކުރީ ބައްދަލުވުމުގައި ބައިވެރިވި ކައުންސިލަރުންގެ އަގުލަބިއްޔަތުންނެވެ. އޭގެ ތެރޭގައި އެމްޑީޕީ ތަމްސީލުކުރައްވާ ހެންވޭރު އުތުރު ދާއިރާގެ ކައުންސިލަރު އައިޝަތު ނިޒްލީ ރަޝީދާއި މައްޗަންގޯޅި މެދު ދާއިރާގެ ކައުންސިލަރު އަހުމަދު ޒަމީރު ހިމެނިވަޑައިގަންނަވައެވެ.
އެހެންކަމުން އެޗްޑީސީގެ ދަށުގައި އޮންނަ ރަޖިސްޓްރީ ބާތިލްކޮށް ކައުންސިލްގެ ދަށަށް ހުޅުމާލެ ބަދަލުވެގެން ދާނެއެވެ.
މިކަމާ ގުޅިގެން ކައުންސިލުގެ ބަހެއް ލިބޭގޮތް ވަނީ ނުވެފައެވެ.
ކައުންސިލުން ހުޅުމާލޭގެ ރަޖިސްޓްރީ ބާތިލްކޮށްފައިވާއިރު، އިދިކޮޅު ޕްރޮގްރެސިވް ކޮންގްރެސް ކޯލިޝަނުން މި ހުކުރު ދުވަހު "ކޮތަރުކޮށި" ގެ ނަމުގައި ބާއްވާ ޖަލްސާގެ މައްސަލަ ވަނީ ހޫނުވެފައެވެ. ހުޅުމާލޭގެ ބެލެނިވެރި އެޗްޑީސީން ބުނީ އެ ޖަލްސާ ބޭއްވޭނީ އެ ކޯޕަރޭޝަނުން ހުއްދަދިނުމުން ކަމަށެވެ.
އިއްޔެ އެޗްޑީސީން ނެރުނު ނޫސްބަޔާނުގައި ބުނީ، ހުލުމާލޭގެ ސަރަހައްދުތަކުގައި ހަރަކާތްތައް ބޭއްވޭނީ އެ ކޯޕަރޭޝަނުގެ ހުއްދައާއެކު ވަކި އުސޫލުތަކެއްގެ ދަށުން ކަމަށާއި، ނަމަވެސް އިދިކޮޅު ކޯލިޝަނުން ބޭއްވުމަށް ރާވަމުންދާ ހަރަކާތަކީ އެ އުސޫލުތަކާ ހިލާފަށް ބާއްވާ ހަރަކާތެއް ކަމަށެވެ. ނަމަވެސް ކައުންސިލުން ވަނީ އެ ޖަލްސާ ބާއްވަން ހުއްދަދީފައެވެ.
