އަންހެނަކު އޭނާގެ ފިރިމީހާގެ ބަނޑަށް ވަޅި ހަރައި ޒަހަމް ކޮށްލައިފިއެވެ.
އެނގިފައިވާ ގޮތުގައި މި ހާދިސާ ހިނގާފައިވަނީ މާލޭގައެވެ.
އައިޖީއެމްއެޗުން ބުނީ ތޫނު އެއްޗަކުން ހަމަލާދީގެން 34 އަހަރުގެ ފިރިހެނަކު އެ ހޮސްޕިޓަލަށް ގެންގޮސްފައިވާ ކަމަށާއި އަދި އެމީހާއަށް ފަރުވާ ދެމުން ދަނީ އައިސީޔޫގައި ކަމަށެވެ.
އެކަމާ ގުޅިގެން "ދަ ޕްރެސް" އަށް މައުލޫމާތު ދެއްވަމުން ފުލުހުންގެ މީޑިއާ އޮފިޝަލް ވިދާޅުވީ މިމަހު 6 ވަނަ ދުވަހުގެ ރޭ އަންހެނަކު ފިރިހެނަކަށް ތޫނު އެއްޗަކުން ހަމަލާދީފައިވާ މައްސަލައެއް ފުލުހުންނަށް ހުށަހަޅާފައިވާ ކަމަށެވެ.
އަދި އެމައްސަލަ ތަހުގީގު ކުރަމުން ދާ ކަމަށް ފުލުހުން ބުނެއެވެ.
އެނގިފައިވާ ގޮތުގައި ހަމަނުޖެހުން ހިނގީ ދެމަފިރިންގެ ދެމެދުގައެވެ. ނަމަވެސް އެކަން ހިނގީ ކިހިނެތް ވެގެން ކަމެއް އަދި ސާފެއް ނުވެއެވެ.
އެނގިފައިވާ ގޮތުގައި އެ އަންހެން މީހާއަކީ ނަފްސާނީ ބައްޔަށް ފަރުވާ ހޯދަމުންދާ މީހެކެވެ.
