ކޮވިޑްގެ އާ ވޭރިއަންޓާ ގުޅިގެން ސައުތު އެފްރިކާގެ ގައުމުތަކުން ރާއްޖެ އައުން މަނާކޮށްފިއެވެ.
ހެލްތް ޕްރޮޓެކްޝަން އެޖެންސީން ބުނީ، ސައުތް އެފްރިކާ އަދި އެ ސަރަހައްދުގެ ބައެއް އެހެނިހެން ގައުމުތަކުން ފެނިފައިވާ ސާސްކޯވް-2 ވައިރަސްގެ 'އޮމިކްރޯން" ވޭރިއެންޓާ ގުޅިގެން އާންމު ރައްޔިތުންގެ ސިއްހަތާއި ރައްކާތެރި ކަމަށްޓަކައި، ގާނޫނު ނަންބަރު 2021/7 (އާންމު ސިއްހަތު ރައްކާތެރި ކުރުމުގެ ގާނޫނުގެ 34 ވަނަ މާއްދާގެ ޅ އާއި އެ ގާނޫނުގެ 12 ވަނަ މާއްދާގެ ނ ގެ 3 ވަނަ ނަންބަރުގެ ދަށުން ރައްކާތެރި ކަމުގެ ފިޔަވަޅެއްގެ ގޮތުގައި މިރޭ 12:00 އިން ފެށިގެން ވަކިގޮތެއް އަންގަންދެން ފިޔަވަޅުތަކެއް އެޅުމަށް ނިންމާފައިވާ ކަމަށެވެ.
އެ ގޮތުން ސައުތު އެފްރިކާ، ނެމީބިއާ، މޮޒަންބީކް، ލެސޯތޯ، ބޮޓްސްވާނާ، ޒިންބާބްވޭ، އެސްވަތީނީން އިން ރާއްޖެއަށް ފަތުރުވެރިން އެތެރެވުން ހުއްޓާލަން ވަނީ ނިންމާފައެވެ. މީގެތެރޭގައި ދިވެހިރާއްޖެއަށް އައުމުގެ 14 ދުވަސް ކުރިން އިސްވެ ބަޔާން ކުރި ގައުމުތަކުގައި އުޅެފައިވާ މީހުންނާއި 12 ގަޑިއިރަށް ވުރެ ގިނަ އިރު ޓްރާންސިޓްވެފައި އަންނަ މީހުން ވެސް ހިމެނޭނެ ކަމަށް އެޗްޕީއޭ އިން ބުނެއެވެ.
ދިވެހިރާއްޖެއަށް އައުމުގެ 14 ދުވަސް ކުރިން ސައުތު އެފްރިކާ، ނެމީބިއާ، މޮޒަންބީކް، ލެސޯތޯ، ބޮޓްސްވާނާ، ޒިންބާބްވޭ، އެސްވަތީނީން ގައި އުޅެފައިވާ 12 ގަޑިއިރަށްވުރެ ގިނަ އިރު ޓްރާންސިޓްވެފައި އަންނަ މީހުން ހިމެނޭ ގޮތަށް ރާއްޖެ އަންނަ ދިވެހިންނާއި ވާކްވިސާގައި އަންނަ މީހުން ރާއްޖެ އައުމަށް ފަހު 14 ދުވަހުގެ މުއްދަތަށް ކަރަންޓީން ވާން ޖެހޭނެއެވެ. މިފަދަ ފަރާތްތައް ކަރަންޓީނުން ރިލީސް ކުރެވޭނީ 14 ދުވަސް ހަމަވުމުން ކޮވިޑު-19 އަށް ޓެސްޓް ހަދައި ނަތީޖާ ނެގެޓިވް ވުމުން ކަމަށް އެޗްޕީޢޭއިން ބުނެއެވެ.
އެޗްޕީއޭއިން ބުނީ، ސައުތު އެފްރިކާ، ނެމީބިއާ، މޮޒަންބީކް، ލެސޯތޯ، ބޮޓްސްވާނާ، ޒިންބާބްވޭ، އެސްވަތީނީ އިން ދިވެހިރާއްޖެއަށް ދަތުރު ފަށާފައިވާ ފަރާތްތަކުންނާއި، ވޭތުވެ ދިޔަ 14 ދުވަސް ތެރޭގައި މި ގައުމުތަކުން ދިވެހިރާއްޖެއަށް އެތެރެވެފައިވާ މީހުން މިވަގުތު ޕީސީއާރު ޓެސްޓެއް ހެދަން ވާނެ ކަމަށެވެ. ހަމައެއާއެކު ސާދަ ދުވަސް ނުވަތަ އެއަށްވުރެ ދިގު މުއްދަތަކަށް ރާއްޖޭގައި ހޭދަކުރާ މީހުން، 14 ދުވަސް ފުރިހަމަ ވުމުން އިތުރު ޕީސީއާރު ޓެސްޓެއް ހެދަން ވާނެ ކަމަށާއި ރާއްޖޭގައި 14 ދުވަހަށް ވުރެ ކުރު މުއްދަތެއް ހޭދަކުރާ ފަރާތްތަކުން ރާއްޖޭން ފުރުމުގެ ކުރިން އިތުރު ޕީސީއާރު ޓެސްޓެއް ހެދަން ވާނެ ކަމަށް އެޗްޕީއޭ އިން ބުނެއެވެ. ފުރުމުގެ ކުރިން ޓެސްޓު ހަދާނީ ކުރިން ޕީސީޢާރް ޓެސްޓެއް ހެދިތާ 3 ދުވަސްވެފަިއވާ ނަމަ ކަމަށް އެޗްޕީއޭ އިން ބުނެއެވެ.
މި އިއުލާނާ އެއްގޮތަށް ދައުލަތުގެ ހުރިހާ އިދާރާތަކާއި މުއައްސަސާތަަކުން ފިޔަވަޅު އެޅުމަށް އެޗްޕީއޭއިން ބުނެއެވެ. އަދި ދައުލަތުގެ އިދާރާތަކާއި މުއައްސަސާތަކުން އަޅާ ފިޔަވަޅުތަކާއި ދޭ އިރުޝާދުތަކަށް އަމަލު ކުރުމަށް އެޗްޕީއޭއިން އިލްތިމާސް ކުރެއެވެ.
