މީގެ 7 އަހަރުކުރިން 2014 ވަނަ އަހަރު، މާލޭގައި ބާރު ސްޕީޑްގައި ދުއްވި ޕިކަޕަކުން ސައިކަލުތަކެއްގައި ޖެހި ހިނގި އެކްސިޑެންޓެއްގައި އުމުރުން 4 އަހަރުގެ ކުއްޖަކު މަރުވި މައްސަލައިގައި މަރުގެ ދިޔައިގެ ގޮތުގައި 1 މިލިއަން ރުފިޔާ ދައްކަން ކްރިމިނަލް ކޯޓުން ހުުކުމްކޮށްފިއެވެ.
އެ ހާދިސާ ހިނގާފައިވަނީ މަޖީދީ މަގުން ބާރު ސްޕީޑްގައި މަގުގެ ނުބައި ފަޅިން ދުއްވާފައި ދަނިކޮށް، ދެ ސައިކަލެއްގައި ޖެހިއެވެ. އެ އެކްސިޑެންޓްގައި 4 އަހަރުގެ ކުއްޖަކު މަރުވިއިރު އިތުރު ބަޔަކަށް އަނިޔާވިއެވެ. މި މައްސަލާގައި ދައުވާކުރީ ހ. ހެޕީނައިޓް އިރުމަތީބައި މުހައްމަދު އާދަމްގެ މައްޗަށެވެ.
ކްރިމިނަލް ކޯޓުން ކުރި ހުކުމުގައި ވަނީ ޕިކަޕް ދުއްވާފައި ވަނީ އެއްގަމު ދަތުރުފަތުރުގެ ގަވާއިދުތަކާ ހިލާފަށް އަދި ބާރު ސްޕީޑްގައި ކަން ހެކިތަކުން ސާބިތުވާ ކަމަށެވެ. އަދި އިހުމާލުގެ އަމަލުން މީހަކު މަރުވެފައި ވާތީ އާއި މަރުވި ކުއްޖާގެ ވާރިސުން މަރުގެ ދިޔަ ބޭނުންވާ ކަމަށް ބުނެފައިވާތީ، މަރުގެ ދިޔައިގެ ގޮތުގައި އެއް މިލިއަން ރުފިޔާ ދައްކަން ވަނީ ހުކްމްކޮށްފައެވެ.
މީގެ އިތުރުން، ކައްފާރާގެ ގޮތުގައި ޖެހިޖެހިގެން ދެ މަސް ދުވަހު ރޯދަ ހިފަން ވެސް އެ މީހާގެ މައްޗަށް ވަނީ ހުކްމްކޮށްފައެވެ.
މަރުުގެ ދިޔައިގެ ގޮތުގައި އެއް މިލިއަން ރުފިޔާ ދައްކަން ރާއްޖޭގައި ފުރަތަމަ ފަހަރަށް އެންގިއިރު، މީގެ ކުރިން މަރުގެ ދިޔައިގެ ގޮތުގައި ނަގައިދެނީ އެއް ލައްކަ ރުފިޔާއެވެ. މަރުގެ ދިޔަ އެއް މިިލިއަނަށް ބޮޑުކުރީ މިދިޔަ ޖުލައި މަހު ސުޕްރީމް ކޯޓުންނެވެ.
