މޫސުމީ ވިއްސާރައިގެ ސަބަބުން އިންޑިއާ އަދި ނޭޕާލުގައި ފެންބޮޑުވެ، އެތައް ބަޔަކު މަރުވެއްޖެއެވެ.
މި ހާދިސާތަކުގައި މިހާތަނަށް 100ށް ވުރެ ގިނަ މީހުން މަރުވެފައިވާ ކަމަށް ވަނީ ރިޕޯޓު ކޮށްފައެވެ. މި ވިއްސާރައިގެ ސަބަބުން އެންމެ ބޮޑު ގެއްލުމެއް ލިބިފައިވަނީ އިންޑިއާއަށެވެ.
އެގައުމުގެ ކެރެލާ އަދި އުތަރަކަންދަށް ވިއްސާރައިގައި ބޮޑެތި ގެއްލުން ތަކެއް ލިބިފައި ވާއިރު ކެރެލާއިން 39 މީހުން އަދި އުތަރަކަންދުން 46 މީހުން މަރުވެ 11 މީހަކު ގެއްލިފައި ވާއިރު އެމީހުން ހޯދުމުގެ މަސައްކަތް މިހާރުވެސް ދަނީ ކުރަމުންނެވެ.
ނޭޕާލަށް ބަލާއިރު އެގައުމުން 31 މީހުން މަރުވެ 43 މީހުން ގެއްލިގެން ހޯދުމުގެ މަސައްކަތް ދަނީ ކުރިއަށެވެ. ފެންބޮޑުވުމުގެ އިތުރުން މި ދެ ގައުމަށް ބިންގަނޑު ކަނޑައިގެން ދިއުމުގެ ހާދިސާތައް ވެސް ވަނީ ކުރިމަތި ވެފައެވެ. މި ހާދިސާތަކުގައި އެތައް ބައެއްގެ ގެދޮރު ގެއްލިފައި ވާއިރު އެމީހުންނަށް އެހީވުމުގެ މަސައްކަތް ދެ ގައުމުގެ އޮފިޝަލުން ވެސް ދަނީ ކުރަމުންނެވެ.
އިންޑިއާގެ އެކި ހިސާބުތަކަށް އެލާޓްތައް ނެރެމުން ދާއިރު ޖުމްލަކޮށް ހުރިހާ ފަރާތްތަކުން ވެސް މޫސުމަށް ސަމާލުވުމަށް އެގައުމުގެ ކަމާބެހޭ ފަރާތްތަކުން ވަނީ އިލްތިމާސް ކޮށްފައެވެ.
މި ދެ ގައުމަކީ ވެސް މީގެ ކުރިންވެސް މޫސުމީ ވިއްސާރައިގެ އަސަރު ވަރަށް ބޮޑަށް ކޮށްފައިވާ ދެ ގައުމެވެ. އަދި އެ ހާދިސާތަކުގައި އެތައް ބަޔަކު މަރުވެ، ބޮޑެތި ގެއްލުންތަކެއް ލިބުމާއެކު ގިނަ އަދަދެއްގެ ބަޔަކު ގެއްލިފައިވެސް ވެއެވެ.
