ފުލުހުން މިދިޔަ ހުކުރު ދުވަހު ހިންގި ހާއްސަ އޮޕަރޭޝަނެއްގައި 215 ކިލޯގެ މަސްތުވާތަކެއްޗާއެކު ހައްޔަރުކުރި ދެ މީހުންގެ ވަނަވަރު އާންމުކޮށްފިއެވެ.
ފުލުހުންގެ ޑްރަގް އެންފޯސްމެންޓް ޑިޕާޓްމެންޓް (ޑީއީޑީ) އާއި ފޮރެންސިކްސް އާއި ރ. އަތޮޅުގެ ފުލުހުންނާއި މެރިން ޕޮލިސް ގުޅިގެން މިދިޔަ ބުދަ ދުވަހުން ފެށިގެން ހިންގި ހާއްސަ އޮޕަރޭޝަނެއްގައި ގާތްގަނޑަކަށް 215 ކިލޯގެ ހެރޮއިން އަތުލައިގެންފައި ވަނީ މިމަހުގެ 15 ވަނަ ދުވަހުއެވެ.
މި މައްސަލައާ ގުޅިގެން ހައްޔަރުކޮށްފައިވަނީ ރ. މަޑުއްވަރި، ފިނިފަރު، އަލީ ޝާކިރު (42އ) އާއި ރ. މަޑުއްވަރި، ފެހިއަލި، ނިމާލް އަބްދުލް ހާރިޒް (33އ)އެވެ.
އެ ދެ މީހުންގެ ބަންދަށް ރ. މަޑުއްވަރީ ކޯޓުން 15 ދުވަސް ޖަހައިދީފައިވާ މިދިޔަ ހޮނިހިރު ދުވަހުއެވެ.
ހުކުރު ދުވަހު 215 ކިލޯގެ މަސްތުވާތަކެތި އަތުލައިގަނެފައިވާއިރު، އޭގެ ކުރީ ދުވަހު 100 ކިލޯއަށް ވުރެ ގިނަ މަސްތުވާތަކެއްޗާއެކު، ފުލުހުން ވަނީ 10 މީހުން ހައްޔަރު ކޮށް، އޭގެ ތެރެއިން 2 މީހަކު ދޫކޮށްލާފައެވެ.
