މިއަހަރުގެ އޮކްޓޫބަރުމަހުގެ 4 އިން 8 އަކަށް ފާހަގަ ކުރުމަށް ހަމަޖެހިފައިވާ "ދުނިޔޭގެ ކަސްޓަމާ ސާވިސް" ހަފުތާއާ ގުޅުވައިގެން އެމްޓީސީސީއިން މިއަހަރުގެ "ހިނިތުންވުމާއެކު" ކެމްޕޭން އިފްތިތާހު ކޮށްފިއެވެ.
އެމްޓީސީސީން ބުނީ އެ ކެމްޕެއިންގެ އެންމެ ބޮޑުމަގްސަދަކީ ކުންފުނީގެ މުއައްޒަފުންގެ މެދުގައި ކަސްޓަމާ ސާވިސްގެ މުހިއްމު ކަމާ މެދު ހޭލުންތެރިކަން އިތުރުކުރުމާ ކުންފުނިން ހިދުމަތް ލިބިގަންނަ އެންމެހާ ކަސްޓަމަރުންގެ ކަސްޓަމާ އެކްސްޕީރިއެންސް މިހާރަށްވުރެ ރަނގަޅު ކުރުން ކަމަށެވެ. އަދި ކުންފުނީގެ އުންމީދަކީ "ހިނިތުންވުމާއެކު" ކެމްޕެއިގެ ސަބަބުން އެމްޓީސީސީ ކަސްޓަމަރުންނާ ދެމެދު އޮންނަ ގުޅުން އިތުރަށް ބަދަހިވެ ކަސްޓަމަރުން ކުންފުންޏަށް ކުރާ އިތުބާރު ބޮޑުވެގެން ދިއުން ކަމަށް ވެސް އެމްޓީސީސީން ބުނެއެވެ.
އެމްޓީސީސީގައި ބޭއްވި އެރަސްމިއްޔާތު އިފްތިތާހްކޮށްދެއްވީ ކުންފުނީގެ ޗީފް އޮޕްރޭޓިން އޮފިސާ ޝާހިދު ހުސައިން މޫސާއެވެ.
އެރަސްމިއްޔާތުގައި ވާހަކަދައްކަވަމުން ޝާހިދު ވިދާޅުވީ އެމްޓީސީސީއަކީ މިގައުމުގެ ތަފާތު އެކިސިނާއަތްތަކުގައި ގިނަ ރައްޔިތުންތަކަކަށް ސީދާގޮތުން ހިދުމަތްދެމުންދާ ކުންފުންޏެއް ކަމަށާ ކަސްޓަމަރުން ހިތްހަމަޖެހޭފަދަ ހިދުމަތެއް ދިނުމަށް ކުންފުނީގެ ކޮންމެ މުއައްޒަފަކު ވެސް ގަދައަޅާ މަސައްކަތް ކުރަންވާނެ ކަމަށެވެ.
އެ ކެމްޕެއިން ކާމިޔާބުކަމާއެކު ކުރިއަށްގެންދިއުމަށް ހުރިހާ މުވައްޒަފުންގެ ތަރުހީބާ އެއްބާރުލުން ވަރަށް މުހިންމު ކަމަށާ ހުރިހާ މުވައްޒަފުންގެ އެއްބާރުލުން އެކެމްޕެއިނަށް ލިބޭނެކަމުގެ ފުރިހަމަ ޔަގީންކަން އޮތްކަމަށް ވެސް ޝާހިދު ވިދާޅުވިއެވެ.
އެ ރަސްމިއްޔާތުގައި ގެސްޓްސްޕީކަރސްގެ ގޮތުގައި ބައިވެރިވެވަޑައިގެންނެވީ ކޯޕަރޭޓް ޓްރޭނިން އިންސްޓިޓިއުޓްގެ ފަރާތުން ޑރ. ހުސައިން ސަނީއުމަރާއި މުހައްމަދު ޔަމާނީއެވެ. އެބޭފުޅުންގެ ވާހަކަގައި ކަސްޓަމަރުންނަށް ދޭ ހިދުމަތް ރަނގަޅު ކުރުމުގެ މުހިއްމު ކަމުގެ މައްޗަށް އަލިއަޅުއްވާލެއްވި ކަމަށް އެމްޓީސީސީން ބުނެއެވެ.
އެމްޓީސީސީން ބުނީ "ހިނިތުންވުމާއެކު" ކެމްޕެއިން ފެށުމުގެ ގޮތުން އިއްޔެ އިން ފެށިގެން އޮކްޓޫބަތު 28 2021 އާ ހަމައަށް ބަހާލާގެން ކުންފުނީގެ ކަސްޓަމަރުންނަށް ވަރަށް ހާއްސަ އެތައް ހަރަކާތްތަކެއް ކުރިޔަށް ގެންދިއުމަށް ހަމަޖެހިފައިވާ ކަމަށެވެ.
