އެކި ރަށްރަށުގައި މަސައްކަތް ކުރާ ބީއެމްއެލްގެ މުވައްޒަފުންގެ ނަފްސާނީ ދުޅަހެޔޮކަން ދަމަހައްޓައި ކުރިއެރުވުމުގެ ގޮތުން، އެފަދަ އިދާރާތަކާ ގުޅިގެން ޕްރޮގްރާމްތައް ހިންގަން ނިންމާފައިވާ ކަމަށް، އެ ބޭންކުން ބުނެފިއެވެ.
ބީއެމްއެލުން ބުނީ، މި ޕްރޮގްރާމްގެ ދަށުން، އެ ބޭންކުގައި މަސައްކަތްކުރާ މުވައްޒަފުންނަށް ބޭނުންވާ ކޮންސަލްޓޭޝަން އާއި ކައުންސިލިންގެ ހިދުމަތްތަކުގެ ހަރަދުތައް ހަމަޖައްސައިދޭނެ ކަމަށާއި، ނަފްސާނީ އެހީތެރިކަމަށް ބޭނުންވާ މުވައްޒަފުންނަށް އެހީތެރިކަން ހޯދުމަށް ބާރު އަޅާނެ ކަމަށެވެ.
މީގެ އިތުރުން، ދަރިން ތަރުބިއްޔަތު ކުރުމާއި، ވޯކް ލައިފް ބެލެންސްގެ އިތުރުން ވަޒީފާގެ މާހައުލުގައި ނަފްސާނީ ދުޅަހެޔޮކަމާ ގުޅޭ ގޮތުން ހޭލުންތެރި ކުރުމަށްވެސް ސެޝަންތައް ބޭއްވުމަށް ހަމަޖެހިފައިވާ ކަމަށް ބޭންކުން ބުންޏެވެ.
މިގޮތުން ބީއެމްއެލުން ވަނީ އެ ބޭންކުގެ މުވައްޒަފުންނަށް ކޮންސަލްޓޭޝަން އާއި ކައުންސިލިންގެ ހިދުމަތްތައް ފޯރުކޮށްދިނުމަށްޓަކައި ތިން އިދާރާއަކާއި އެކު އެމްއޯޔޫއެއް ގައި ސޮއިކޮށްފައެވެ. އެ އިދާރާތަކަކީ:
- ތިބާ ސައިކޮލޮޖީ
- ސޮސައިޓީ ފޯ ހެލްތް އެޑިއުކޭޝަން (ޝީ)
- އިންސްޓްޓިއުޓް އޮފް މެންޓަލް ވެލްބިއިން (އައި.އެމް.ޑަބްލިއު.ބީ)
މިކަމާ ގުޅޭގޮތުން، ބީއެމްއެލްގެ ޑެޕިއުޓީ ސީއީއޯ އައިޝަތު ނޫރައްދީން ވިދާޅުވީ އެ ބޭންކުގެ މުވައްޒަފުންގެ ނަފްސާނީ ދުޅަހެޔޮކަން އިތުރުކުރުމަށްޓަކައި ފަސޭހައިން ލިބޭނެ ހިދުމަތްތައް ހޯދަން އެއްބަސްވުމަކީ ލިބޭ އުފަލެއް ކަމަށާއި، ދުނިޔެއަށް ބެލި ކަމުގައިވިޔަސް، ނަފްސާނީ ދުޅަހެޔޮކަމުގެ މުހިންމުކަން ފާހަގަ ކުރެވޭ ކަމަށެވެ.
އަދި ބީއެމްއެލްއެކޭ އެއްފަދައިން އެހެން އޮފީސްތަކުންނާއި އިދާރާތަކުންވެސް މިފަދަ ޕްރޮގްރާމްތައް ހިންގައި، ނަފްސާނީ ދުޅަހެޔޮކަމަށް މަސައްކަތް ކުރާނެ ކަމަށް އުންމީދު ކުރައްވާ ކަމަށްވެސް އައިޝަތު ވިދާޅުވިއެވެ.
ބީއެމްއެލުން ބުނީ އިންޓަނޭޝަނަލް ބެސްޓް ޕްރެކްޓިސްތައް ދިރާސާ ކުރުމަށްފަހު، މުވައްޒަފުންނާ ގުޅޭ ސިޔާސަތުތައް އެކުންފުނިން އެކުލަވާލަމުންދާ ކަމަށާއި، އެގޮތުން މުވައްޒަފުންނާ ގުޅޭ އެކި ސިޔާސަތުތަކަށް ބަދަލުތައް ގެންނަމުންދާ ކަމަށެވެ.
