އެހެން ރޭތަކަށް ވުރެ މިރޭ ކޮވިޑް ކޭސްތައް ދަށް

އެހެން ރޭތަކަށް ވުރެ، ވޭތުވެދިޔަ 24 ގަޑިއިރުތެރޭ ކޮވިޑް-19 އަށް ޕޮޒިޓިވްވި މީހުންގެ އަދަދަށް ދަށްވުމެއް އަތުވެއްޖެއެވެ.

އާންމުކޮށް ކޮވިޑު ކޭސްތަކުގެ އަދަދު ދުވާލަކު 70 އަށް ވުރެ އިތުރު ކަމަށްވީ ނަމަވެސް، މިރޭ އެޗްޕީއޭ އިން އާންމުކުރި ތަފާސްހިސާބުތަކުން ދައްކާ ގޮތުގަ ވޭތުވެދިޔަ 24 ގަދިއިރުތެރޭ ރާއްޖެއިން ޕޮޒިޓިވްވީ 57 ،މީހުންނެވެ. އެއީ މާލެއިން ޕޮޒިޓިވްވި 22 މީހުންނާއި، ރަށްރަށުން ޕޮޒިޓިވްވި 34 މީހުންގެ އިތުރުން ރިސޯޓަކުން ޕޮޒިޓިވްވި މީހެކެވެ.

ކޮވިޑަށް ޕޮޒިޓިވްވި މީހުންގެ އިތުރުން، ވޭތުވެދިޔަ 24 ގަޑިއިރު ނެގި ސާމްޕަލްތަކުގެ އަދަދުވެސް އެހެން ދުވަސްތަކާ އަޅާ ބަލާއިރު މަދެވެ. މިގޮތުން 57 މީހުން ޕޮޒިޓިވްވީ އިއްޔެ ނެގި 2،940 ސާމްޕަލްގެ ތެރެއިންނެވެ.

މިއާއެކު ރާއްޖެއިން ކޮވިޑަށް ޖުމްލަ ޕޮޒިޓިވްވެފައި ވަނީ 84،866 މީހުންނެވެ. މީގެ ތެރެއިން 83،074 މީހުން ބަލިން ވަނީ ރަނގަޅުވެފައެވެ. އަދި 1،548 އަދި ބަލިން ފަސޭހަވެފައި ނުވާއިރު، މީގެ ތެރެއިން 24 މީހަކަށް އަންނަނީ ފެސިލިޓީތަކުގަ ފަރުވާ ދެމުންނެވެ. އަދި 231 މިހާތަނަށް ރާއްޖެއިން މިބަލީގަ ވަނީ މަރުވެފައެވެ.

ކޮވިޑުން ރައްކާތެރިވުމަށްޓަކައި އަޅާ ފިޔަވަޅެއްގެ ގޮތުން، އެޗްޕީއޭ އިން ވަނީ ވެކްސިން ފުރިހަމަ ކޮށްފައިވާ ފަރާތްތަކުގެ ތެރެއިން ޝަރުތު ހަމަވާ ފަރާތްތައް، އަންނަ ހޯމަ ދުވަހުން ފެށިގެން ބޫސްޓަ ޝޮޓް ނުވަތަ އިތުރު ޑޯޒް ޖަހަން ޖެހޭ ގޮތަށް ނިންމާފައެވެ.