ކަނޑައެޅިގެން ވަކި ފަރުވާއެއް ހޯދިފައި ނުވާ ކޮރޯނާވައިރަސް ޑިޒީޒް (ކޮވިޑް-19)އަށް ޕޮޒިޓިވްވި ޕޭޝަންޓުންގެ 37 ޕަސެންޓް މީހުންނަކީ، ބަލިން ރަނގަޅުވާތާ އެތައް މަހެއް ވާއިރުވެސް ލޯންގް ކޮވިޑް، ނުވަތަ ކޮވިޑްގެ ދިގު ދެމިގެންދާ އަލާމާތްތަކުގެ ތަކުލީފު އުފުލާ މީހުން ކަމަށް ދިރާސާއަކުން ދައްކައިފިއެވެ.
ނޭޝަނަލް އިންސްޓިޓިއުޓް ފޮ ހެލްތު ރިސާޗްއަދި އޮކްސްފޯޑް ޔުނިވާސިޓީގެ އޮކްސްފޯޑް ހެލްތު ބައޮމެޑިކަލް ރިސާޗް ސެންޓަރު ގުޅިގެން، ފުޅާ ދާއިރެއްގައި ކުރިއަށް ގެންދިޔަ މި ދިރާސާއިން ދައްކާ ގޮތުގައި، ކޮންމެ 3 ޕޭޝަންޓަކުން 1 އަކީ، ސީދާ ބަލިން ރަނގަޅުވާތާ 3 މަހާއި 6 މަހާ ދެމެދު މުއްދަތަކަށް، ލޯންގް ކޮވިޑްގެ ތަކުލީފުތައް އުފުލާ މީހުންނެވެ.
ކޮވިޑްގެ ސީދާ އިންފެކްޝަނުން ސަލާމަތް ވުމަށް ފަހުގައި ދެން ކުރިމަތިލާން ޖެހޭ ލޯންގް ކޮވިޑްގެ ތަކުލީފުތަކުގެ ތެރެއިން އެންމެ އާންމު އެއް ކަމަކީ، އާދަޔާ ހިލާފަށް ވަރުބަލިވުމެވެ. މީގެ އިތުރުން ނޭވާލުމުގެ މައްސަލަތަކާ، ހަށިގަނޑުގައި ވޭން އުޅުމާއި އެންޒައިޓީ ނުވަތަ ހާސް ކަމާއި ނުތަނަވަސްކަމުގެ ބައްޔާއި، ޑިޕްރެޝަން އަދި ބަނޑުގެ އެކި ކަހަލަ އުނދަގޫތައްވެސް ހިމެނޭ ކަމަށް މައުލޫމާތު ލިބެއެވެ.
ލޯންގް ކޮވިޑްގެ އަލާމާތްތައް، ފިރިހެނުންނަށް ވުރެ ގިނައިން އަންހެނުންގެ ކިބައިން ފެންނަ ކަމަށްވެސް ހަބަރު ލިބެއެވެ. މީގެ އިތުރުން އުމުރާވެސް ގުޅުމެއް ވެއެވެ. އުމުރުން ދުވަސްވީ ޕޭޝަންޓުން، ވަކިން ހާއްސަކޮށް ފިރިހެން ޕޭޝަންޓުންގެ މެދުގައި ގިނައީ ކޮގްނިޝަން ނުވަތަ ފަހުމްވުމުގެ މައްސަލަތަކާއި، ނޭވާލުމަށް ދަތިތަކެއް ކުރިމަތިވުމުގެ މައްސަލައެވެ. ޅަ ޕޭޝާންޓުންނާއި އަންހެނުންގެ މެދުގައި އާންމު ވަނީ، ބޮލުގައި ރިއްސުމާ، ބަނޑުގެ އެކި ކަހަލަ އުނދަގޫތަކުގެ އިތުރުން ޑިޕްރެޝަންއެވެ.
ދިރާސާގެ އިތުރު ހޯދުމަކަށް ބަލާއިރު، ހޮސްޕިޓަލުގައި އެޑްމިޓްކޮށްގެން ފަރުވާ ދޭން ޖެހުނު ކޮވިޑް ޕޭޝަންޓުންނަށް، ފަހުމްވުމުގެ މައްސަލަ ދިމާވާ މިންވަރު، އެނޫން ޕޭޝަންޓުންނާ އަޅާ ބަލާއިރު އިތުރު ކަން ފާހަގަ ކުރަންޖެހެއެވެ.
މި ދިރާސާއަކީ، އެމެރިކާގައި ކޮވިޑް ޖެހި، އެ ބަލިން ރަނގަވަޅުވަމުން އައި 270000 މީހުންގެ ކިބައިން މައުލޫމާތު އެއްކޮށްގެން ތައްޔާރު ކޮށްފައިވާ ބޮޑު ދިރާސާއެކެވެ.
