ފުލުހުން ޖާސޫސްކުރުމާ ބެހޭ ގަވާއިދު މުރާޖައާ ކުރަން ހުށައެޅި މައްސަލަ އެމްޑީޕީއަށް ބަލައިގަންނަން ނުކެރުމުން ސިޔާސީ ނުފޫޒު ވަދެފައިވާ މިންވަރު އިތުރަށް ސާފުވާ ކަމަށް ރައްޔިތުންގެ މަޖިލީހަށް މާވަށު ދާއިރާގެ މެމްބަރު މުހައްމަދު ސައީދު ވިދާޅުވެއްޖެއެވެ.
މިއަދު ސައީދު މަޖިލީހަށް ހުށައެޅީ، ފުލުހުންނަށް ހުށަހަޅާ މައްސަލަތައް ތަހުގީގު ކުރުމުގައި ބޭނުންކުރާ ހާއްސަ އުކުޅުތަކާ ބެހޭ ގަވާއިދުގެ ސަބަބުން، އާންމުންނަށް ގާނޫނުއަސާސީން ލިބޭ ބައެއް ހައްގުތަކަށް ހުރަސްއެޅޭ ކަމަށް ބުނެ، އެ ގަވާއިދު މުރާޖައާ ކުރުމަށެވެ.
ސައީދު ހުށަހެޅި މައްސަލަ ބަލައިގަތުމާ ގުޅޭ ގޮތުން މަޖިލީހުގެ ތަޅުމުގައި ނެގި ވޯޓުގައި ފެންނަކަމަށް ވޯޓު ދެއްވީ އެންމެ ހަތް މެމްބަރުންނެވެ. ނުފެންނަ ކަމަށް 22 މެމްބަރުން ވޯޓު ދެއްވި އެވެ. އެހެންކަމުން އެ މައްސަލަ ބަލައިގަންނަށް ފާހެއް ނުވިއެވެ.
މިދިޔަ މަހުގެ 30 ގައި އާންމު ކުރި އެ ގަވާއިދުގެ ދަށުން، ގައުމީ ސަލާމަތާ ގުޅުން ހުރި ކަންކަމާއި، ޖިނާއީ ކުށްތަކުގެ މައްސަލަތަކުގައި ތުހުމަތު ކުރެވޭ ފަރާތްތައް އުޅޭ ނޫޅޭގޮތް ބަލާ ސިއްރުން މޮނީޓާ ކުރުމުގެ ބާރު ފުލުހުންނަށް ލިބޭނެއެވެ. އެގޮތުން ކެމެރާ ފަދަ ވަސީލަތްތައް ހަރުކޮށްގެން އެކަން ކުރުމުގެ ބާރު ފުލުހުންނަށް ލިބޭނެއެވެ. ނަމަވެސް ފުލުހުންނަށް މިގޮތަށް އަމަލު ކުރެވޭނީ ކޯޓު އަމުރެއްގެ ދަށުންނެވެ.
މަޖިލީހަށް މި މައްސަލަ ހުށަހެޅުއްވުމަށް ފަހު، ސައީދު ވިދާޅުވީ ފުލުހުންނަށް މި ގަވާއިދުގެ ދަށުން ދީފައިވާ ބާރުގެ ސަބަބުން އާންމުންގެ މިނިވަންކަމަށް ހުރަސްއެޅިގެން ދާ ކަމަށެވެ.
އެގޮތުން، މި ގަވާއިދުގެ ސަބަބުން އާންމުންގެ ޒާތީ ދިރިއުޅުމަށް ހުރަސްއެޅޭ ކަމަށާއި، ގާނޫނުއަސާސީން އާންމުންނަށް ލިބޭ ހައްގުތަކަކީ ނިގުޅައިގަނެވޭނެ ހައްގުތަކެއް ނޫން ކަމަށް ސައީދު ވިދާޅުވިއެވެ. އެހެންކަމުން މި ގަވާއިދު އަލުން މުރާޖައާ ކުރުމަށް މަޖިލީހަށް މައްސަލަ ހުށަހަޅުއްވަން ނިންމެވީ ކަމަށް ވެސް ސައީދު ވިދާޅުވިއެވެ.
