ދަތުރެއް ނުވަތަ ބާބަކިއުއެއް ރާވާލާއިރު އެންމެ ބޮޑަށް ދެކެވޭ އެއް ވާހަކައަކަށް ވެގެން ދާނީ ހަމަ ޔަގީނުން ވެސް ގާލިކް ބްރެޑް ތައްޔާރު ކުރާނެތޯ ކުރެވޭ ސުވާލެވެ. ކުރިއާ ހިލާފަށް ލޮނުމެދުގެ ރަހަ ޒުވާން ޖީލަށް ކަމުދާން ފަށާފައި ވާއިރު އެއީ ސިއްހަތަށް ނުހަނު ގިނަ ފައިދާތަކެއް ލިއްބައިދޭ އެއްޗެކެެވެ.
ތަފާތު ގިނަ ފައިދާތަކެއް ލިއްބައިދޭ ރޯ ލޮނުމެދަކީ ކެއްސުމާއި، އަރިދަފުސް ރޯގާ ޖެހުމުން ވެސް ކާން ރަނގަޅު އެއްޗެކެވެ. އަރިދަފުސް ރޯގާ ޖެހޭތާ ކުރީކޮޅު ކޮންމެ ދުވަހަކު ލޮނުމެދު ބޭނުންކުރުމަކީ ރޯގާ އަވަހަށް ފަސޭހަވެ، ރަނގަޅުވާ ކަމެއް ކަމަށް ސައިންސްވެރިން ވަނީ ބުނެފައެވެ. މީގެ އިތުރުން އޭގައި އެކުލެވިގެންވާ "އެލިސިން" ކޮމްޕައުންޑުން ލޭހޮޅިތަކުގެ ތެރޭގައި ނުރަނގަޅު ސަރުބީ ތަތްވެ ހަރުލުމަށް ހުރަސް އަޅައެވެ.
ބައެއް މީހުން ތައްޔާރުކުރާ ކޮންމެ ކާއެއްޗަކަށް ލޮނުމެދު އަޅާއިރު ބައެއް މީހުންނަށް ދުވާ ވަހުން ލޮނުމެދާ ގާތްވާންވެސް ޖެހިލުން ވެއެވެ. ނަމަވެސް އެއިން ލިބޭ ގިނަގުނަ ފައިދާތައް އެނގޭނަމަ ކޮންމެހެން ވެސް ލޮނުމެދުގެ އަޖުމަ ބަލާލުމަށް މަސައްކަތް ކުރާނެއެވެ. ލޮނުމެދުން ލިބޭ އިތުރު ފައިދާތަކަށް ބަލާއިރު ދިރާސާތަކުން ދައްކާގޮތުގައި ހަށިގަނޑުގައި ޓްރައިގްލިސެރައިޑް، އަދި މުޅި ހަށިގަނޑުގައި ޖުމްލަ ކޮލެސްޓްރޯލްގެ މިންވަރު ދަށްކޮށް މަދުކުރުމުގެ ކުޅަދާނަކަން ލޮނުމެދަށް ލިބިފައި ވެއެވެ.
މީގެ އިތުރުން ކޮންމެ ދުވަހެއްގެ ކެއުމުގައި ލޮނުމެދު ހިމެނުމަކީ ހަށިގަނޑުގެ ހަޖަމު ކުރާ ނިޒާމް ރަގަޅުކޮށްދޭނެ ކަމެއް ކަމަށް ޑޮކްޓަރުން ވިދާޅުވާއިރު ހަޖަމުކުރުމުގެ މަސައްކަތް ފުރިހަމަ ގޮތުގައި ގެންދިއުމަށް ގޮހޮރަށް ލިބޭ އެހީއަކަށް ލޮނުމެދު ވެއެވެ. އަދި ހަޖަމުކުރާ ނިޒާމުގެ އެތެރޭގެ ބައިތަކުގައި އުފެދޭ މައްސަލަތައް ހައްލުކުރުމަށް ވެސް ލޮނުމެދު ބޭނުންކުރުން އެހީއަކަށް ފުދޭ ކަމަށް ދިރާސާތަކުން ވަނީ ހާމަވެފައެވެ.
ކޮންމެ އަކަސް 'ގާލިކް'ގެ މި ރަހައަކީ އަނގަޔަށް މީރު ނޫނަސް ހަށިގަނޑުގެ އެކިއެކި ގުނަވަންތަކާ އެކި ބަލިތަކަށް ވާ ރަނގަޅު ފަރުވާއެކެވެ.
