މިއީ ދިވެހި ރާއްޖެ ކުޑަޔަސް ދިވެހިން ކުދި ނޫންކަން ދުނިޔެ ހެކިވާ ވަގުތު ކަމަށް ރައީސުލްޖުމްހުރިއްޔާ އިބްރާހިމް މުހައްމަދު ސޯލިހު ވިދާޅުވެއްޖެއެވެ.
ރައީސް ސޯލިހު އެހެން ވިދާޅުވީ އދ ގެ އާންމު މަޖިލީހުގެ 76 ވަނަ ދައުރު ހުޅުވުމުގެ ޖަލްސާގައި ތަގުރީރު ކުރައްވަމުންނެވެ.
އެގޮތުން ރައީސް ވިދާޅުވީ ބައިނަލްއަގްވާމީ މަސްރަހުގައި ބަސްބުނުމުގެ ގާބިލިއްޔަތު އަދި އެކަމުގެ ކުފޫ ދިވެހިންގެ ކިބައިގައި ހަމަވޭތޯ، ނުވަތަ ނޫންތޯ މީގެ 56 އަހަރު ކުރިން ސުވާލު އުފެއްދި ކަމަށެވެ.
ދިވެހީންނަށް މިނިވަންކަން ލިބުނުތާ 56 އަހަރު ފަހުން އެމަނިކުފާނު މިއަދު އާންމު މަޖިލީހުގައި ވާހަަކަ ދައްކަވަނީ ދިވެހިންގެ މާދަރީ ބަހުން ކަމަށާއި ދިވެހި ބަހަކީ ދިވެހިންނަށް އަސަރުގަދަ އަދި އެންމެ ފޮނި ބަސް ކަަމަށެވެ.
އޭގެ އިތުރުން ދިވެހި ބަހުން އެ މަޖިލީހުގައި ވާހަކަ ދެއްކެވުމަކީ ހުރިހާ ދިވެހިންނަށް ލިބިގެންދާ މަތިވެރި ޝަރަފެއް ކަމަށް ރައީސް ފާހަގަކުރެއްވިއެވެ.
އަދި މިއީ ގައުމު ކުޑަޔަސް ދިވެހިން ކުޑަ ނޫންކަމަށް މުޅި ދުނިޔެ ހެކިވާ ވަގުތު ކަމަށާ، މިއީ ހުރިހާ ދިވެހީންނަށް ލިބުނު ނުހަނު ބޮޑު އުފަލަކާ މަތިވެރި ޝަރަފެއް ކަމަށްވެސް އެމަނިކުފާނު ވިދާޅުވިއެވެ.
ރައީސް އިތުރަށް ވިދާޅުވީ ރިޔާސަތުގައި އިންނެވި އދ ގެ މި ދައުރަށް ގައުމުތަކުން ހޮވި ރައީސް، ރާއްޖޭގެ ފޮރިން މިނިސްޓަރު އަބްދުﷲ ޝާހިދުގެ ރިޔާސަތަށް އުންމީދީ ރިޔާސަތުގެ ނަމުން ނަންދެއްވީތީ އެކަމާ އުފާކުރައްވާ ކަމަށެވެ. އަދި އެއީ އިންސާނުން ތަހަންމަލު ކުރަމުންދާ ތަކުލީފާއި ކުރިމަތިވެފައިވާ ގޮންޖެހުންތަކުން މިންޖުވުމަށް އޮތް ފުރަތަމަ ފަރުވާއަކީ އެކަމަށް ކުރާ އުންމީދު ކަމަށް ރައީސް ސޯލިހު ވިދާޅުވިއެވެ.
