އެމްޓީސީސީގެ ބޮޑު ޑްރެޖަރު، މަހާ ޖައްރާފަށް ކެޕްޓަނަކު ހޯދަން އިއުލާން ކޮށްފިއެވެ.
އެމްޓީސީސީން ކުރި އިއުލާނެއްގައި ބުނީ އެމަގާމަށް މީހަކު ނަގަން ބޭނުންވަނީ ކޮންޓްރެކްޓު އުސޫލުން އެއް އަހަރަށް ކަމަށެވެ. އަދި ކޮންޓްރެކްޓް ގެ މުއްދަތު އިތުރު ކުރުމަށް ހަމަޖެހިފައިވަނީ މަސައްކަތުގެ ފެންވަރަށް ބެލުމަށްފަހު ކަމަށް އެމްޓީސީސީން ބުނެއެވެ.
އެމަގާމުގެ މުސާރައިގެ ގޮތުގައި 109،000 ރުފިޔާ ދިނުމަށް ހަމަޖެހިފައިވާއިރު މުސާރައިގެ އިތުރުން ސްޓާފް މެޑިކަލް އިންޝުއަރެންސް އަދި ޕެންޝަން ސްކީމްގައި ބައިވެރިވެވޭނެ ކަމަށް އެމްޓީސީސީން ބުނެއެވެ.
މިމަގާމަށް ކުރިމަތިލާ ފަރާތްތަކުގެ ހުންނަން ޖެހޭ ޝަރުތުތައް:
- ސެޓްފިކެޓް އޮފް ކޮމްޕީޓެންސީ : މާސްޓާ އަންލިމިޓެޑް (500 GT ގެ އުޅަނދެއްގެ މާސްޓަރުކަން (STCW II/2))
- ޖީއެމްޑީއެސްއެސް ސެޓްފިކެޓް ފުރިހަމަ ކޮށްފައިވުން.
- STWC Manila 2010 (އެއަށް ގެނެވިފައިވާ އިސްލާހުތައް ހިމެނޭ ގޮތަށް) ގައި ބަޔާން ކޮށްފައިވާ މިންގަނޑަށް ފެތޭ ތައުލީމާއި ތަމްރީން ހާސިލްކޮށްފައިވުން.
- މަދުވެގެން 1 އަހަރު ދުވަހުގެ ތެރޭގައި ބާތިލުނުވާނެ ސައްހަ މެޑިކަލް ފިޓްނަސް ލިބިފައިވުމާއެކު ރަނގަޅު ފެނުމާއި އަޑުއިވުން ލިބިފައިވުން.
- އިނގިރޭސި ބަހުން މުއާމަލާތްކުރުމާއި ލިޔެކިޔުމުގެ ގާބިލްކަން ލިބިފައިވުން.
- އެންސިލަރީ ޕްރޮފިޝަންސީ ޓްރެއިނިންގ ކޯސް ފުރިހަމަކޮށްފައިވުން (އަޕްޑޭޓެޑް STCW ބޭސިކް ސޭފްޓީ ޓްރެއިނިން ކޯސް ހިމެނޭ ގޮތަށް) ޕީއެމްއެސް ސިސްޓަމަށާއި ކޮމްޕިއުޓަރަށް ފަރިތަވުން.
- ނިޔަމިކަމުގެ ރައްކާތެރިކަމަށްޓަކައި، ECDIS އަށް ފަރިތަވުން.
- ބްރިޖް ރިސޯސް މެނޭޖްމަންޓާއި، ލީޑާޝީޕް އަދި މެނެޖީރިއަލް ހުނަރުތަކުގެ އިލްމު ލިބިފައިވުން.
- މަދުވެގެން 2 އަހަރު ދުވަހު މާސްޓާ (އެފްޖީ ޓްރޭޑް) މަގާމް އަދާކޮށްފައިވުން ނުވަތަ މަދުވެގެން 5 އަހަރު ދުވަހުގެ މުއްދަތަށް ޗީފް އޮފިސާ މަގާމު އަދާކޮށްފައިވުން.
އެމްޓީސީސީން ބުނީ އެމަގާމަށް ޝައުގުވެރިވާ ފަރާތްތަކުން އެމްޓީސީސީގެ އޮންލައިން ޖޮބް އެޕްލިކޭޝަން ޕޯޓަލް މެދުވެރިކޮށް ސެޕްޓެމްބަރު 09، 2021 ވަނަ ދުވަހުގެ ކުރިން އެޕްލިކޭޝަން ހުށަހަޅަންވާނެ ކަމަށެވެ.
