ރާއްޖެއިން މިއަދު ކޮވިޑަށް 139 މީހުން ޕޮޒިޓިވް ވެއްޖެއެވެ.
ހެލްތް ޕްރޮޓެކްޝަން އޭޖެންސީ (އެޗްޕީއޭ) އިން ބުނީ، ވޭތުވެ ދިޔަ 24 ގަޑިއިރުގެ ތެރޭގައި ޕޮޒިޓިވް ވި މީހުންގެ ތެރޭގައި ހިމެނެނީ މާލެ ސަރަހައްދުން 27 މީހަކާއި އަތޮޅުތެރޭގެ ރަށްރަށުން 96 މީހަކާއި މިވަގުތު ހިންގަމުން ގެންދާ ރިސޯޓު ތަކުން 16 މީހެއް ކަމަށެވެ.
މި އަދަދަކީ ޓެސްޓު ކުރި 5238 ސާމްޕަލްގެ ތެރެއިން ޕޮޒިޓިވް ވެފައިވާ އަދަދު ކަމަށް އެޗްޕީއޭ އިން ބުނެއެވެ.
މިއަދު ޕޮސިޓިވްވި 139 މީހުންނާ އެކު ބަލި ޖެހުނު މީހުންގެ އަދަދު މިވަނީ 80678 އަށް އަރާފައެވެ. މިއަދު ޕޮޒިޓިވް ވި މީހުންނާއި ބަލިން ރަނގަޅުވި މީހުންނާއެކު އެކްޓިވް ކޭސްގެ އަދަދު އުޅެނީ 1607 ގައެވެ.
ކޮވިޑް ޖެހިގެން މަރުވި މީހުންގެ އަދަދު 226 އަށް އަރާފައި ވާއިރު ހޮސްޕިޓަލުގައި އެދުމަތިކޮށްގެން މިހާރު ފަރުވާދެމުން ގެންދަނީ 11 މީހުންނަށް ކަމަށް އެޗްޕީއޭއިން ބުނެއެވެ. މިއަދު ކޮވިޑް ބަލީގައި މަރުވެފައި ވަނީ އުމުރުން 90 އަހަރުގެ ދިުވެހި ފިރިހެނެކެވެ. އެއީ ގދ. ކޮވިޑް ފެސިލިޓީގައި ފަރުވާ ދެމުން ދިޔަ މީހެކެވެ.
ރާއްޖެއިން މި ބަލި ފެނުނުތާ މިއަދާ ހަމައަށް 539 ދުވަސް ވެފައި ވާއިރު، މިދިޔަ އަހަރުގެ ނިޔަލަށް 49 މީހަކު ވަނީ މަރުވެފައެވެ. މި ބަލީގައި މި އަހަރު ވަނީ 177 މީހަކު މަރުވެފައެވެ.
މި ވަގުތު ރާއްޖޭގެ ހާލަތަށް ބަލާއިރު ކޮވިޑް ބަލި ފެތުރުން ކޮންޓްރޯލް ކުރުމަށް ރާއްޖޭގެ 25 ރަށެއް ވަނީ މޮނިޓަރިންގެ ހާލަތަށް ލާފައެވެ. އެ ގޮތުން މިއަދު މޮނިޓަރިންއަށް ލާފައިވާ ރަށްރަށުގެ ތެރޭގައި އައްޑޫ ސިޓީގެ ހިތަދޫ، މަރަދޫ، މަރަދޫ ފޭދޫ، ފޭދޫގެ އިތުރުން އދ. މަހިބަދޫއާއި، ވ. ތިނަދޫއާއި، ށ. ކަނޑިތީމާއި، މ، ވޭވަށް އަދި ހދ. ނޮޅިވަރަމެވެ.
