އދ. މަހިބަދޫއާއި، ވ. ތިނަދޫއާއި، ށ. ކަނޑިތީމާއި، ހދ. ނޮޅިވަރަމަްއަދި މ، ވޭވަކަށް މީހުން އަރާ ފޭބުން މަނާކޮށް މޮނިޓަރިންއަށް ލާފައިވާ ރަށްރަށުގެ ލިސްޓުގައި އެ ފަސް ރަށުގެ ނަަން ހިމަނައިފިއެވެ.
ހެލްތް ޕްރޮޓެކްޝަން އެޖެންސީ (އެޗްޕީއޭ) އިން ބުނީ، މި ވަގުތު 21 ރަށެއް ވަނީ މޮނިޓަރިންގެ ހާލަތުގައި ކަމަށެވެ. އެ ގޮތުން މިއަދު މޮނިޓަރިންގެ ހާލަތަށް ބަދަލުކޮށްފައި ވަނީ ފަސް ރަށެއް ކަމަށާއި އެއީ މަހިބަދޫއާއި، ތިނަދޫއާއި ކަނޑިތީމުގެ އިތުރުން ވޭވަށް އަދި ނޮޅިވަރަމް ކަމަށް އެޗްޕީއޭއިން ބުނެއެވެ.
މިއަދު 5 ރަށެއް މޮނިޓަރިންގެ ހާލަތަށް ބަދަލުކޮށްފައިވާ އިރު އިއްޔެ އާއި އޭގެ ކުރީ ދުވަހުވެސް ވަނީ ދެ ރަށެއް މޮނިޓަރިންގެ ހާލަތަށް ބަދަލުކޮށްފައެވެ. އިއްޔެ މޮނިޓަރިންއަށް ލީ ލ. މުންދޫއާއި، ށ. މިލަންދޫއެވެ. އޭގެ ކުރީ ދުވަހު މޮނިޓަރިންއަށް ލީ ގދ. މަޑަވެއްޔާއި، ތ. ވޭމަންޑޫއެވެ.
އެއަށްފަހު މި މަހުގެ 23 ވަނަ ދުވަހު ގދ. ގައްދޫ، މި މަހުގެ 21 ވަނަ ދުވަހު ޏ. ފުވައްމުލައް އަދި މި މަހުގެ 20 ވަނަ ދުވަހު ކ. ގާފަރު ވަނީ މޮނިޓަރިން އަށް ލާފައެވެ. ހަމައެއާއެކު މި މަހުގެ 19 ވަނަ ދުވަހު ގއ. ކަނޑުހުޅުދޫއާއި މ. މަޑުއްވަރީ ވެސް ވަނީ މޮނިޓަރިން އަށް ލާފައެވެ.
މި މަހގައި މޮނިޓަރިންއަށް ލީ އިތުރު 3 ރަށެއް މި ލިސްޓުގައި ހިމެނޭ އިރު އެއީ މި މަހުގެ 16 ވަނަ ދުވަހު މޮނިޓަރިންއަށް ލީ އދ. ހަންޏާމީދޫ އާއި ހއ. އިހަވަންދޫއެވެ. އަދި މި މަހުގެ 3 ވަނަ ދުވަހު މޮނިޓަރިންއަށް ލީ އއ. ހިމާންދޫން ވެސް އަދި ވެސް އޮތީ އެ ހާލަތުގައެވެ.
މި ލިސްޓުގައި ދެން އޮތީ 4 ރަށެކެވެ. އެ ރަށްރަށުގެ ތެރެއިން 3 ރަށެއް މޮނިޓަރިންއަށް ލާފައި ވަނީ މިދިޔަ ޖުލައި މަހުއެވެ. އެއީ ކ. ކާށިދޫއާއި، ށ. ފީވަކާއި، ދ. ކުޑަހުވަދޫއެވެ.
މި ވަގުތު މޮނިޓަރިންގައި އޮތް ރަށްރަށުގެ ތެރެއިން އެންމެ ގިނަ ދުވަސްވެފައިވާ ރަށަކީ ރ. ދުވާފަރެވެ. އެރަށް މޮނިޓަރަށް ލާފައި ވަނީ މިދިޔަ މެއި މަހުގެ 25 ވަނަ ދުވަހެވެ.
