މާދަމާ ސޮއި ކުރާ ބްރިޖާ ބެހޭ ގޮތުން އިނގެނީ ކިހާ ވަރަކަށް؟

"ގްރޭޓާ މާލެ ކަނެކްޓިވިޓީ ޕްރޮޖެކްޓް" ގެ ދަށުން މާލެ، ވިލިމާލެ، ގުޅީފަޅު އަދި ތިލަފުށި ގުޅުވައި އަޅަން ނިންމާފައިވާ ބްރިޖުގެ މަސައްކަތާ ބެހޭ އެއްބަސްވުމުގައި މާދަމާ ސޮއިކުރަން ނިންމާފައި ވާއިރު މި ބްރިޖާ ބެހޭ ގޮތުން އިނގެނީ ކިހާ މިންވަރަކަށްތޯ އެއީ އުފެދޭނެ ސުވާލެކެވެ.

އިންޑިއާގެ ހިލޭ އެހީ އަދި ކްރިކެޓް ލައިންގެ ދަށުން ހަދާ ގްރޭޓާ މާލެ ކަނެކްޓިވިޓީ ޕްރޮޖެކްޓް (ޖީއެމްޕީސީ) އެގްރީމެންޓް ގައި ދިވެހި ސަރުކާރާއި އިންޑިއާގެ އެފްކޮންސް ކޮމްޕެނީއާ ދެމެދު މާދަމާ ސޮއި ކުރުމަށް ހަމަޖެހިފައި ވާއިރު މި ބްރިޖަކީ ސިނަމާލޭ ބްރިޖަށް ވުރެ ފުރިހަމަ ބްރިޖަކަށް ވާނެ ކަމަށް ސަރުކާރުން ވަނީ ބުނެފައެވެ.

އިންޑިއާގެ އެފްކޮންސް އިންފްރަސްޓްރަކްޗާ ކުންފުންޏާ އެކު ހަދާ އެއްބަސްވުމުގެ ދަށުން އަޅާ މި ބްރިޖްގެ ކުރެހުންތަކުން ފެންނަ ގޮތުގައި ބްރިޖުގައި ހަތަރު ލޭނެއް އޮންނާނެއެވެ. ބްރިޖުގައި ހަތަރު ރަށަށް ދާނެ މަގު އަންގައި ދިނުމަށް ބޯޑު ހަރުކޮށްފައި ހުންނާނެްއވެ.

ބްރިޖުން އަރައިގެން ގޮސް ތިލަފުށި، ވިލިމާލެ އަދި ގުޅީފަޅަށް ދާން އޮންނަ މަގު ގުޅޭ ސަރަހައްދުގައި ވަށް ބުރެއް ހަދާ އިރު އެ ބުރުގެ މެދުގައި ހަނދު ފަޅިއެއް ރަމްޒުކޮށްދޭ މޮނިއުމެންޓެއް ވެސް ކުރެހުމުން ފެނެއެވެ.

ދުވާލާއި ރޭގަނޑު މި ބްރިޖު އޮންނާނެ ގޮތް ކުރެހުންތަކުގައި ހިމެނޭއިރު ބްރިޖުގެ ރީތިކަން ބޮޑަށް ފެންނާނީ އެކި ކުލަ ކުލައިގެ ބޮކިތަކުން ބްރިޖް ރޭގަނޑު ދިއްލާލުމުން ކަމަށް ކުރެހުންތަކުން ފެނެއެވެ.

މި ބްރިޖަށް ފައިނޭންސް ކުރަނީ އިންޑިއާއިން ކަމަށް ވާތީ މަޝްރޫއުއަށް ކުރިމަތިލެވެނީ ވެސް އިންޑިއާގެ ކުންފުނިތަކަށް އެކަންޏެވެ. އިންޑިއާގެ އެގްޒިމް ބޭންކުން ޕްރީކޮލިފައިވާ ކުންފުނިތަކަށް ހުޅުވާލި އެ މަޝްރޫއު ކާމިޔާބުކުރީ އެފްކޮން އިންނެވެ. 6.47 ކިލޯ މީޓަރުގެ ދިގު ބްރިޖް އަދި ކޯސްވޭ އިން މާލެއާއި ވިލިނގިލި، ތިލަފުށި އަދި ގުޅީފަޅު ގުޅާނާލެއެވެ. މަޝްރޫއު ކުރިއަށް ގެންދަނީ ލައިން އޮފް ކްރެޑިޓް އެއްބަސްވުމުގެ ދަށުން ލިބުނު 400 މިލިއަން ޑޮލަރުގެ ލޯނަކާއި 100 މިލިއަން ޑޮލަރުގެ ހިލޭ އެހީންނެވެ.

ޖީއެމްޕީސީ ޕްރޮޖެކްޓްއަކީ ރައީސް އިބްރާހިމް ސޯލިހް އަދި ފޮރިން މިނިސްޓާ އަބްދުﷲ ޝާހިދު 2019 ވަނަ އަހަރު އިންޑިޔާގެ އެކްސްޓާނަލް އެފެއާޒް މިނިސްޓަރު ޑރ. އެސް ޖައިޝަންކަރު އަރިހުގައި އެހީތެރިކަމަށް އެދިވަޑައިގެންނެވި ޕޮރޮޖެކްޓެކެވެ.

ގުޅީފަޅުގައި އަޅާ ބައިނަލްއަގްވާމީ ބަނދަރު އަދި ތިލަފުށި އިންޑަސްޓްރިއަލް ޒޯން މާލެއާއި ގުޅާލުމުން މި ޕްރޮޖެކްޓް ވެގެން ދާނީ ރާއްޖޭގެ އިގްތިސާދީ މައި އިންޖީނަށެވެ. މި މަޝްރޫގެ މަސައްކަތް ދެއަހަރު ދުވަސް ތެރޭގައި ނިންމާނެ ކަމަށް ސަރުކާރުން ބުނެއެވެ. މި މަޝްރޫގެ ފުލް ރިޕޯޓު އެކުލަވާލީ ހޮންކޮންގް ގެ އިންފްރާސްޓްރަކްޗާސް ކޮންސަލްޓަންޓް ފާމް، އަރުޕް އެލްޓީޑީއެވެ.

މި ބްރިޖް ނުވަތަ ކޯސްވޭ ލިންކްގެ ދެރަށް ދޭތެރޭ ކަނޑުގައި އަޅާ މައި ބްރިޖްތަކުގައި 140 ކިލޯ މީޓަރު ހުންނާނެއެވެ. އަދި ފުންފަޅުތަކުގައި 1.45 ކިލޯ މީޓަރު އަށް މެރިން ވިއާޑަކްޓް، އަދި ގޮނޑުދޮށުގައި 2.32 ކިލޯ މީޓަރު މެރިން ވިއާޑަކްޓް އަދި ބިމާ އެއްހަމައެއްގައި 2.96 ކިލޯ މީޓަރު ގެ މަގުހިމެނެއެވެ. މާލެ އަދި ވިލިނގިއްޔާ ބްރިޖް ގުޅޭ ހިސާބުގައި ޓްރެފިކްލައިޓު ހަރުކޮށްފައި ހުންނާނެއެވެ. އަދި ގުޅީފަޅު އަދި ތިލަފުށި ބްރިޖް ގައި ހުންނާނީ ވައްބުރު ޖަންކްޝަނެވެ. ކޮންމެ ރަށެއްގައި ވެސް ރަށުތެރެއަށް ގުޅާލައިފައިވާ ބަސް ސްޓޭޝަންސް ހުންނާނެއެވެ. އަދި ސޯލާ ޕެނަލްސް ހަރުކޮށް ބޮކިތަށް ސޯލާ ޕަވާއިން ދިއްލޭ ނިޒާމް ހަަމަޖައްސަން ވަނީ ނިންމާފައެވެ.