ފުލުހުންގެ އިސް އޮފިސަރުންތަކެއް މަގާމުން ވަކިކުރަން ފުލުހުންގެ ބޯޑުން ނިންމި ނިންމުމަކީ ރަނގަޅު ނިންމުމެއްތޯ ކަށަވަރު ކުރުމަށް ރައްޔިތުންގެ މަޖިލީހުގެ ސަލާމަތީ ހިދުމަތްތަކާ ބެހޭ ކޮމިޓީ (241 ކޮމިޓީ) އަށް ހުށަހަޅައިފިއެވެ.
މާދަމާ ރައްޔިތުން މަޖިލީހުގެ ތިން ވަނަ ދައުރުގެ ޖަލްސާތައް ފަށާގޮތަށް ވަނީ ހަމަޖެހިފައެވެ.
އެ މައްސަލަ ރައްޔިތުންގެ މަޖިލީހަށް ހުށަހެޅުއްވީ ކުރީގެ ޑިފެންސް މިނިސްޓަރު އަދި ދަނގެތި ދާއިރާގެ މެމްބަރު މުހައްމަދު ނާޒިމެވެ.
ރައްޔިތުންގެ މަޖިލީހުގެ ރައީސް މުހައްމަދު ނަޝީދަށް އެޑްރެސް ކުރައްވައި ނާޒިމް ފޮނުއްވި ސިޓީގައި ވިދާޅުވެފައި ވަނީ ފުލުހުންގެ ގާނޫނު ތަންފީޒުކުރުމަށް ކަމަށް ބުނެ ފުލުހުންގެ ހިދުމަތުގައި އެތަކެއް އަހަރުތަކެއް ހޭދަކޮށްފައި ވާ ފަރާތްތަކަކަށް ގާނޫނުން ކަށަވަރު ކޮށްދީފައި ވާ ވަޒީފާގެ ރައްކާތެރިކަން ގެއްލިފައިވާ ކަމަށެވެ. އަދި އެކަމުގައި އެ ފަރާތްތަކަށް ޖަވާބުދާރީ ވުމުގެ ފުރުސަތުވެސް ލިބިފައި ނުވާ ކަމަށް ވިދާޅުވެފައި ވެއެވެ.
އެހެންކަމުން އެ މައްސަލައަކީ 241 ކޮމެޓީން ބަލަން ޖެހޭ މައްސަލައެއް ކަމަށް ނާޒިމުގެ ސިޓީގައި ފާހަގަ ކުރައްވާފައި ވެއެވެ. އަދި ވިދާޅުވީ އެ ފަރާތްތައް ފުލުހުންގެ ވަޒީފާއިން ވަކިކުރުމަށް ނިންމާފައި ވަނީ ގާނޫނާ އެއްގޮތަށްތޯ ބެލުމަށް ރައްޔިތުންގެ މަޖިލީހުގެ މެންބަރެއްގެ ހައިސިއްޔަތުން މަޖިލީހަށް ހުށަހަޅުއްވާ ކަމަށެވެ.
ފުލުހުންގެ އިސް އޮފިސަރުންތަކެއް މަގާމުން ވަކިކުރަން ފުލުހުންގެ ބޯޑުން ނިންމި ނިންމުމުގެ މައްސަލަ ނާޒިމު މަޖިލީހަށް ހުށަހަޅުއްވާފައި މިވަނީ އެކަމާ ގުޅިގެން ބައެއް ފަރާތްތަކުން ކަންބޮޑުވުން ފާޅުކުރަމުން ގެންދަނިކޮށެވެ. އެގޮތުން އެ ނިންމުން ސިޔާސީ ނުފޫޒުތަކުން އެއްކިބާވެ ތިބެ އަލުން މުރާޖައާ ކުރުމަށް އިދިކޮޅު ކޯލިޝަނުން ވެސް ވަނީ ގޮވާލާފައެވެ.
ރައްޔިތުންގެ މަޖިލީހުން މިދިޔަ އަހަރު ފާސްކުރި ފުލުހުންގެ ހިދުމަތުގެ ގާނޫނުގެ ދަށުން ފުލުހުންގެ ލީޑަޝިޕުގައި ތިއްބަވަނީ ގާބިލު ބައެއްތޯ ފުލުހުންގެ ބޯޑުން ކަށަވަރުކުރަން ޖެހެއެވެ. އަދި އެކަން ކުރަން އަންގާފައި އޮންނަނީ ގާނޫނަށް އަމަލުކުރަން ފަށާތާ ހަތަރު މަސް ދުވަހުގެ ތެރޭގައެވެ.
ފުލުހުންގެ ކޮމިޝަނަރު ފިޔަވާ އިސް މަގާމުތަކުގައި ތިއްބަވާ އޮފިސަރުން ގާބިލުތޯ ބެލުމުގެ ނަމުގައި ގާނޫނަށް ގެނައި އިސްލާހަކީ، ފެބްރުއަރީ 7 އާ ގުޅުވާ، ފުލުހުންގެ އޮފިސަރުންތަކެއްގެ ވަޒީފާ ގެއްލުވާލުމަށް ގެނައި އިސްލާހެއް ކަމަށް އެކިފަރާތްތަކުން އަންނަނީ ބުނަމުންނެވެ. އެއީ މަޖިލީހުގެ ނަިބުރައީސް އީވާ އަބްދުﷲ ހުށަހަޅުއްވައިގެން ފާސްކުރި އިސްލާހެކެވެ.
