މިއަދު ރަށްރަށުން 72 މީހަކާ އެކު ޖުމްލަ 108 މީހަކު ކޮވިޑަށް ޕޮޒިޓިވް ވެފައި ވާ ކަމަށް ހެލްތް ޕްރޮޓެކްޝަން އޭޖެންސީ (އެޗްޕީއޭ) އިން ބުނެފިއެވެ.
އެޗްޕީއޭ އިން ބުނީ، ވޭތުވެ ދިޔަ 24 ގަޑިއިރުގެ ތެރޭގައި ޕޮޒިޓިވް ވި މީހުންގެ ތެރޭގައި ހިމެނެނީ މާލެ ސަރަހައްދުން 21 މީހަކާއި އަތޮޅުތެރޭގެ ރަށްރަށުން 72 މީހަކާއި މިވަގުތު ހިންގަމުން ގެންދާ ރިސޯޓު ތަކުން 15 މީހެއް ކަމަށެވެ. މި އަދަދާ އެކު މި މަހު ޕޮޒިޓިވްވި މީހުންގެ އަދަދު މި ވަނީ 1032 އަށް އަރާފައެވެ.
މިއަދު 115 މީހަކު ވަނީ ކޮވިޑް ބަލިން ފަސޭހަ ވެފައެވެ. އެމީހުންނާ އެކު މިހާތަނަށް ބަލި ޖެހުނު ޖުމްލަ މީހުންގެ ތެރެއިން ޖުމްލަ 75660 މީހަކު ވަނީ ބަލިން ރަނގަޅުވެފައެވެ. މިއަދު ޕޮޒިޓިވްވި މީހުންނާ އެކު ބަލިން ރަނގަޅު ވި މީހުން އުނި ކުރުމުން އެކްޓިވް ކޭސްގެ އަދަދު މިވަނީ 2570 އަށް ދަށްވެފައެވެ. އިއްޔެ އެކްޓިވް ކޭސްގެ ގޮތުގައި ތިބީ 2577 މީހުންނެވެ.
މިހާތަނަށް ރާއްޖެއިން ކޮވިޑް ޖެހުނު ޖުމްލަ އަދަދަކީ 78464 އެވެ. މިވަގުތު ކޮވިޑް ޖެހިގެން ފަރުވާ ހޯދަމުން ދާ 19 މީހަކު ތިބި އިރު މިހާތަނަށް ބަލި ޖެހިގެން މަރުވި މީހުންގެ ޖުމްލަ އަދަދު ވަނީ 222 އަށް އަރާފައެވެ. މި މަހު ކޮވިޑް ބަލީގައި މަރުވެފައި ވަނީ އެންމެ މީހެކެވެ. އެއީ މި މަހުގެ ދެ ވަނަ ދުވަހު މަރުވި މީހެކެވެ.
ކޮވިޑާ ގުޅިގެން އެޗްޕީއޭ އިން ބަންދުކުރާ ރަށްތައް ބޮޑުތަނުން މަދުވުމަށް ފަހު އަނެއްކާ ވެސް ނަންބަރުތައް ވަނީ މަތިވާން ފަށާފައެވެ. މިއަދު ތ. ހިރިލަންދޫ މޮނިޓަރިންގެ ހާލަތަށް ލާފައި ވާއިރު އެ ރަށައެކު މިހާރު 14 ރަށެއް ވަނީ މޮނިޓަރިންގެ ހާލަތުގައެވެ. މޮނިޓަރިންގެ ހާލަތުގައި އޮންނަތާ އެންމެ ގިނަ ދުވަސް ވެފައިވާ ރަށަކީ މެއި 7 ވަނަ ދުވަހު މޮނިޓަރިންއަށް ލީ ރ. ދުވާފަރެވެ. ހަމައެއާއެކު މިދިޔަ މަހު ބަންދު ކުރި ރަށްތަކުގެ ތެރެއިން ނުވަ ރަށެއް މޮނިޓަރިންގައި އެބަ އޮތެވެ. އެއީ ށ. ފޯކައިދޫ އާއި ގދ. ނަޑެއްލާ، ކ. ކާށިދޫ، ހދ. ކުޅުދުއްފުށި، ހއ. ދިއްދޫ، މ. ކޮޅުފުށި، ށ. ފީވައް، ހއ. ތަކަންދޫ އަދި ދ. ކުޑަހުވަދޫ އެވެ. މީގެ އިތުރުން މިމަހު ބަންދުކޮށްފައި ވަނީ ގއ. ވިލިނގިލި، ރ. އުނގޫފާރު، ލ. ގަން، ލ. ފޮނަދޫ، އއ. ހިމަންދޫ އަދި ތ. ހިރިލަންދޫ އެވެ.
ރާއްޖެއިން މި ބަލި ފެނުނުތާ މިއަދާ ހަމައަށް 520 ދުވަސް ވެފައި ވާއިރު، މި ދިޔަ އަހަރު ނިމުނު އިރު 13،757 ކޮވިޑް ޕޮޒިޓިވް ކޭސް ވަނީ ރިޕޯޓް ކޮށްފައެވެ. މިދިޔަ އަހަރުގެ ނިޔަލަށް 49 މީހަކު ވަނީ މަރުވެފައެވެ. މިއަހަރު މިހާތަނަށް 64599 މީހަކު ޕޮޒިޓިވް ވެފައި ވާއިރު މި ބަލީގައި މި އަހަރު ވަނީ 173 މީހަކު މަރުވެފައެވެ.
108 މީހަކު މިއަދު ޕޮޒިޓިވް ވެފައިވާ އިރު އިއްޔެ ވަނީ ކޮވިޑް ޖެހިގެން 113 މީހަކު ޕޮޒިޓިވް ވެފައެވެ.
