މިއަދު މާލެއިން 19 މީހަކާއެކު ޖުމްލަ 113 މީހަކު ކޮވިޑަށް ޕޮޒިޓިވް ވެފައި ވާ ކަމަށް ހެލްތް ޕްރޮޓެކްޝަން އޭޖެންސީ (އެޗްޕީއޭ) އިން ބުނެފިއެވެ.
އެޗްޕީއޭ އިން ބުނީ، ވޭތުވެ ދިޔަ 24 ގަޑިއިރުގެ ތެރޭގައި ޕޮޒިޓިވް ވި މީހުންގެ ތެރޭގައި ހިމެނެނީ މާލެ ސަރަހައްދުން 19 މީހަކާއި އަތޮޅުތެރޭގެ ރަށްރަށުން 71 މީހަކާއި މިވަގުތު ހިންގަމުން ގެންދާ ރިސޯޓު ތަކުން 23 މީހެއް ކަމަށެވެ. މި އަދަދާ އެކު މި މަހު ޕޮޒިޓިވްވި މީހުންގެ އަދަދު މި ވަނީ 924 އަށް އަރާފައެވެ.
މިއަދު 95 މީހަކު ވަނީ ކޮވިޑް ބަކިން ފަސޭހަ ވެފައެވެ. އެމީހުންނާ އެކު މިހާތަނަށް ބަލި ޖެހުނު ޖުމްލަ މީހުންގެ ތެރެއިން 75545 މީހަކު ވަނީ ބަލިން ރަނގަޅުވެފައެވެ
މިއަދު ޕޮޒިޓިވްވި މީހުންނާއެކު އެކްޓިވް ކޭސްގެ އަދަދު މިވަނީ 2577 އަށް މަތިވެފައެވެ. އިއްޔެ އެކްޓިވް ކޭސްގެ ގޮތުގައި ތިބީ 2559 މީހުންނެވެ. މިހާތަނަށް ރާއްޖެއިން ކޮވިޑް ޖެހުނު ޖުމްލަ އަދަދަކީ 78356 އެވެ. މިވަގުތު ކޮވިޑް ޖެހިގެން ފަރުވާ ހޯދަމުން ދާ 22 މީހަކު ތިބި އިރު މިހާތަނަށް ބަލި ޖެހިގެން މަރުވި މީހުންގެ ޖުމްލަ އަދަދު ވަނީ 222 އަށް އަރާފައެވެ. މި މަހު ކޮވިޑް ބަލީގައި މަރުވެފައި ވަނީ އެންމެ މީހެކެވެ. އެއީ މި މަހުގެ ދެ ވަނަ ދުވަހު މަރުވި މީހެކެވެ.
113 މީހަކު މިއަދު ޕޮޒިޓިވް ވެފައިވާ އިރު އިއްޔެ ވެސް ވަނީ ކޮވިޑް ޖެހިގެން 113 މީހަކު ޕޮޒިޓިވް ވެފައެވެ. މިދިޔަ މަހު ކޭސްތައް 100 އިން ދަށުގައި އުޅުނު މނަމަވެސް މި މަސް ފެށުނު އިރު ކޮވިޑް ކޭސްތައް މި ވަނީ 100 އިން މައްޗަށް ގޮސްފައެވެ.
ރާއްޖެއިން މި ބަލި ފެނުނުތާ މިއަދާ ހަމައަށް 519 ދުވަސް ވެފައި ވާއިރު، މި ދިޔަ އަހަރު ނިމުނު އިރު 13،757 ކޮވިޑް ޕޮޒިޓިވް ކޭސް ވަނީ ރިޕޯޓް ކޮށްފައެވެ. މިދިޔަ އަހަރުގެ ނިޔަލަށް 49 މީހަކު ވަނީ މަރުވެފައެވެ. މިއަހަރު މިހާތަނަށް 64599 މީހަކު ޕޮޒިޓިވް ވެފައި ވާއިރު މި ބަލީގައި މި އަހަރު ވަނީ 173 މީހަކު މަރުވެފައެވެ.
