އުރީދޫ އަތޮޅު ދުވުމުގައި ރަޖިސްޓާވެފައިވާ ބައިވެރިން ދުވުން ނިންމަން ދެން ބާކީ އޮތީ އެއް ދުވަސް ކަމަށް އުރީދޫން ބުނެފިއެވެ.
އުރީދޫއިން ބާއްވާ އަތޮޅު ދުވުމުގެ ބައިވެރިން ދުވުމަށް ހަމަޖެހިފައި ވަނީ މި މަހުގެ 1 ވަނަ ދުވަހުން ފެށިގެން 7 ވަނަ ދުވަހުގެ ނިޔަލަށެވެ. އެހެންކަމުން މާދަމާއަކީ ބައިވެރިން ދުވުން ނިންމަން އޮތް ފަހު ދުވަހެވެ.
ރަޖިސްޓާ ވެފައިވާ ދުވުންތެރިން، އެމީހުންގެ ދުވުން ސްޓްރާވާ އެޕް، ގާމިން ކަނެކްޓް، ރަންޓާސްޓިކް، ނައިކް ރަން ކްލަބް ނުވަތަ ރަންކީޕާ އެޕްލިކޭޝަން މެދުވެރިކޮށް ޓްރެކްކޮށް، ނިންމާފައިވާ ރަން ރޫޓްގެ ސްކްރީން ޝޮޓް، ރަޖިސްޓާވީ އިރު އުރީދޫން ފޮނުވި ކޮންފަމޭޝަން މެސެޖުގައިވާ ލިންކަށް އަޕްލޯޑް ކުރުމުން ޑިޖިޓަލް މެޑަލެއް ލިބޭނެ ކަމަށް އުރީދޫން ބުނެއެވެ. ފިސިކަލް މެޑަލް ބޭނުންނަމަ ކުޑަ އަގަކާއެކު މޫލީ މެދުވެރިކޮށް އަޕްގްރޭޑް ކޮށްލުމުން ރާއްޖޭގެ ކޮންމެ ހިސާބެއްގައި ހުރިނަމަވެސް ހިލޭ ޑެލިވާ ކޮށްދޭނެ ކަމަށް އުރީދޫން ބުނެއެވެ.
މީގެ އިތުރުން އުރީދޫއިން ވަނީ އުރީދޫ އަތޮޅު ދުވުމުގެ ފޮޓޯ އާއި މެޑަލް ސޯޝަލް މީޑިއާގައި ޝެއާކޮށްގެން ހަދިޔާ ހޯދުމުގެ ފުރުސަތު ވެސް ހުޅުވާލާފައެވެ. އެގޮތުން އުރީދޫ އަތޮޅު ދުވުމުގައި ބައިވެރިވާ ފަރާތްތައް ދުވުމުގެ ފޮޓޯއާއި މެޑަލް މި މަހުގެ 9 ވަނަ ދުވަހުގެ ރޭ 11:59 ގެ ކުރިން ސޯޝަލް މީޑިއާގައި ޝެއާ ކޮށްގެން ހަދިޔާ ހޯދޭނެ ކަމަށް އުރީދޫއިން ބުނެއެވެ.
ދުވުމުގެ ފޮޓޯ އާއި މެޑަލް ސޯޯޝަލް މީޑިއާގައި ހިއްސާ ކުރާ އެކައުންޓް ވާން ޖެހޭނީ ޕަބްލިކް އެކައުންޓަކަށް ކަމަށާއި ކޮންމެ ޕޯސްޓެއްގައި އުރީދޫ ޓެގުކޮށް، OoredooAtholhuDhuvun# ޖަހަން ޖެހޭނެ ކަމަށް އުރީދޫން ބުނެއެވެ.
އަތޮޅު ދުވުމުގެ ފޮޓޯތައް ހިއްސާކުރާ ދުވުންތެރިންގެ ތެރެއިން ދެ ނަސީބުވެރިއަކަށް މަމަކް އިން ރޭގަނޑުގެ ކެއުމެއް ނުވަތަ ލަވޭރިއާއިން ޕިއްޒާ ލިބޭނެއެވެ. އަދި މެޑަލް ހިއްސާ ކުރާ ދުވުންތެރިންގެ ތެރެއިން ތިން ނަސީބުވެރިންނަށް ރޭޖް-ހިޓް ޖިމްގެ އެއް މަހުގެ މެމްބާޝިޕް ނުވަތަ ޕިއްޒާ ކިޗަން އިން ޕިއްޒާ ނުވަތަ ލެ ޕާފިއުމްގެ ގިފްޓް ޕެކެއް ލިބޭނެއެވެ.
އުރީދޫ އަތޮޅު ދުވުމަކީ އެ ކުންފުނީގެ އަހަރީ ދުވަހާ ގުޅުވައިގެން މިދިޔަ އަހަރު ފެށި ހަރަކާތެކެވެ. މިދިޔަ އަހަރު ބޭއްވި އަތޮޅު ދުވުމަށް ވެސް ވަނީ ވަރަށް ބޮޑު ތަރުހީބެއް ލިބިފައެވެ.
