ކޮވިޑް ކޭސް ފެނުމުގެ ސަބަބުން ލ. ގަން އަދި ލ. ފޮނަދޫ މިއަދު މޮނިޓަރިންގެ ހާލަތަށް ލައިފިއެވެ.
ހެލްތް ޕްރޮޓެކްޝަން އެޖެންސީ (އެޗްޕީއޭ) އިން ބުނީ، މިއަދު މޮނިޓަރިންގެ ހާލަތަށް ބަދަލުކޮށްފައި ވަނީ ދެ ރަށެއް ކަމަށާއި އެ ދެ ރަށަކީ ލ. އަތޮޅު ގަމާއި ފޮނަދޫ ކަމަށެވެ.
މި ދެރަށް މޮނިޓަރިން ހާލަތަށް ބަދަލު ކުރީ، މާލެއިން ފޮނަދޫއަށް ދިޔަ މީހަކު ޕޮޒިޓިވްވުމާ ގުޅިގެންނެވެ.
ކޮވިޑް ބަލިމަޑުކަން ރަށްރަށުގައި ފެތުރެމުން އަންނަ އިރު މި ދެރަށާ އެކު މިހާރު މޮނިޓަރިންގެ ހާލަތަށް 16 ރަށެއް ވަނީ ލާފައެވެ. އެއީ ގަމާއި ފޮނަދޫގެ އިތުރުން، ހއ. ތަކަންދޫ، ހއ. ދިއްދޫ ހދ. ކުޅުދުއްފުށި، ށ. ފޯކައިދޫ، ށ.ފީވައް، މ. ކޮޅުފުށި، ދ. ކުޑަހުވަދޫ، ރ. ދުވާފަރު، ރ.އުނގޫފާރު، ކ ކާށިދޫ، ގއ. ކޫއްޑޫ، ގއ.ވިލިނގިލި އަދި ގދ. ނަޑެއްލާ އާއި ފުވައްމުލަކެވެ.
މިފަހަކަށް އައިސް، އަތޮޅުތެރޭގެ ބައެއް ރަށްތަކުން ރެންޑަމް ސާމްޕަލްތައް ޕޮޒިޓިވް ވަމުން ދާ މިންވަރު އިތުރު ވަމުން ދާ ކަން ފާހަގަ ކުރެވެއެވެ. އެގޮތުން، ބައެއް ރަށްރަށުން މީހަކު ޕޮޒިޓިވް ކަން އެނގޭއިރު، ރަށުގައި ބަލި ފެތުރި، ރަށުގެ ގިނަ ބަޔަކަށް ބަލި ޖެހިފައި ވެސް އެބަ ހުއްޓެވެ. ބައެއް ފަހަރު އެ ކޭސްތަކަކީ ކަރަންޓީނު ވާ މީހުންނާ ގުޅުން ހުރި ކޭސްތަކަށް ވެސް ވެއެވެ.
