އިތުރު ބަޔަކު ކޮވިޑު-19 އަށް ޕޮޒިޓިވް ވުމާ ގުޅިގެން ހދ. ކުޅުދުއްފުށީގައި ފިޔަވަޅުތައް ހަރުކަށި ކޮށްފިއެވެ.
ކުޅުދުއްފުށީ ކައުންސިލްގެ އިދާރާއިން ކުރި އިއުލާނެއްގައި ބުނީ ކުޅުދުއްފުށީގައި ކޮވިޑް19 ޕޮސިޓިވް ކޭސްތައް ގިނަވަމުންދާ މިދަނޑިވަޅުގައި ހުރިހާ ރައްޔިތުން ވެސް ރައްކާތެރިކަމުގެ ފިޔަވަޅުތައް އަޅާ ކަމާގުޅުންހުރި އިދާރާތަކުން އަންގާ އެންގުންތަކަށް ފުރިހަމައަށް ބޯލެބުމަށް އިލްތިމާސްކުރާ ކަމަށެވެ.
އެގޮތުން އަޅާ ފިޔަވަޅުތަކަށް ހާއްސަ ސަމާލުކަމެއް ދިނުމަށް ވަނީ އެދިފައެވެ.
އަޅާފައިވާ ފިޔަވަޅުތައް:
- ބޭރަށް ނުކުންނަން ޖެހިއްޖެނަމަ މާސްކު ބޭނުން ކުރުން އަދި އެކިއެކި ހިދުމަތް ފޯރުކޮށްދޭ ފަރާތްތައް ކަމުގައިވާ ޓެކްސީ ޑްރައިވަރުންނާ ފިހަރާތަކުގައި މަސައްކަތް ކުރައްވާ ބޭފުޅުން ވެސް މާސްކު އެޅުން.
- ޕާކު ތަކާއި އާންމު އެންމެހާ ތަނެއް ބަންދު ކުރެވިފައިވާތީ މިފަދަ ތަންތަނަށް ނުދިއުން.
- މޫދު އެރޭ ސަރަހައްދާ މޫދަށް ގްރޫޕް ހަދައިގެން ނުދިއުން.
- މަގުމަތީގައި ގުރޫޕް ހަދައިގެން ނޫޅުމާ ކޮންމެހެން ނުކުންނަން ޖެހިގެންނޫނީ ގެއިން ބޭރަށް ނުދިއުން.
- ޒަރޫރީ ހާލަތެއްގައި މެނުވީ އެއްގެއިން އަނެއް ގެއަށް ޒިޔާރަތް ނުކުރުން.
- ކަރަންޓީންގައި ތިއްބަވާ ފަރާތްތަކުން ކަރަންޓީންގެ އުސޫލުތަކަށް ތަބާވުން.
ބަލި އިތުރަށް ފެތުރި ރަށުގެ އާންމު ހާލަތު މިއަށްވުރެ ގޯސްވެއްޖެނަމަ ރައްޔިތުންނަށް ކުރިމަތިވެދާނެ ދަތިތަކުން ސަލާމާތްވުމަށް އިދާރާތަކުން ދޭ އިރުޝާދުތަކާއި އަންގާ އެންގުންތަކަށް އަމަލުކުރުމަށް ކައުންސިލް އިދާރާއިން ވަނީ އެދިފައެވެ. އަދި ބަލި ފެތުރުން ކޮންޓްރޯލްކޮށް ކުޅުދުއްފުށީ އާންމު ހާލަތަށް ގެނައުމަށް ހުރިހާ ރައްޔިތުންގެ އެއްބާރުލުން ދިނުމަށް ވެސް ކައުންސިލް އިދާރާއިން ވަނީ އެދިފައެވެ.
ކުޅުދުއްފުށީ މޮނީޓަރިން އަށް ލާފައިވަނީ ފުލޫ ކުލިނިކަށް ދެއްކި 13 އަހަރުގެ ކުއްޖަކު ޕޮޒިޓިވް ވުމުން މިދިޔަ މަހު 24ގައެވެ.