އުރީދޫ އަތޮޅު ދުވުމުގައި ރަޖިސްޓާ ވުމުގެ ފުރުސަތު އަލުން ހުޅުވާލައިފިއެވެ.
އުރީދޫން ބުނީ އަތޮޅު ދުވުމުގައި ބައިވެރިވުމަށް ގިނަ ފަރާތްތަކަކުން އެދުމާ އެކު ރެޖިސްޓާވުމުގެ ފުރުސަތު ޖުލައި 31، 2021 ގެ ހަވީރު 6 ހަމައަށް އޮންލައިން ޕޯޓަލް މެދުވެރިކޮށް ހުޅުވާލާފައިވާ ކަމަށެވެ.
އޭގެ އިތުރުން ރެޖިސްޓާވެފައިވާ ދުވުންތެރިން ފޭސްބުކް، ޓްވިޓާ އަދި އިންސްޓަގްރާމްގައި ޖުލައި 31، 2021 ގެ މެންދަމު 12ގެ ކުރިން ވާޗުއަލް ބިބް ޝެއާކޮށްގެން އަތޮޅު ދުވުމުގެ ޓީޝާޓެއް ހޯދުމުގެ ފުރުސަތު ވެސް ހުޅުވާލާފައިވާ ކަމަށް އުރީދޫން ބުނެއެވެ.
އުރީދޫން ބުނީ މިއަހަރުގެ ރަންގައި 5 ކިލޯމީޓަރުގެ އިތުރުން، އަލަށް ތައާރަފް ކުރި 10 ކިލޯމީޓަރު ގެ ކެޓެގަރީގައި ވެސް ބައިވެރިވެވޭނެ ކަމަށެވެ. އަދި ދެ ކެޓެގަރީގައި ބައިވެރިވުމަށް ބޭނުންވާ ދުވުންތެރިން ދެކެޓެގަރީއަށް ވަކިން ރެޖިސްޓާވެ މުޅިއަކު 15 ކިލޯމީޓަރު ފުރިހަމަކުރަންޖެހޭނެ ކަމަށެވެ.
ފަސް އަހަރުން މަތީގެ ހުރިހާ އެންމެންނަށްވެސް ބައިވެރިވެވޭ އެ ދުވުމުގައި ބައިވެރިވާ ފަރާތްތައް، އޯގަސްޓް 1 އާ އޯގަސްޓް 7 އާ ދެމެދުގެ ކޮންމެ ވަގުތެއްގައި ވެސް ދުވުން ފުރިހަމަކުރެވޭނެ ކަމަށް އުރީދޫން ބުނެއެވެ. އުރީދޫން ބުނީ ރެޖިސްޓްރޭޝަން ފުރިހަމަ ކުރުމުން ޑިޖިޓަލް ބިބް އަދި ކޮންފަރމޭޝަން މެސެޖެއް ލިބޭނެ ކަމަށެވެ.
ރެޖިސްޓާކުރާ ދުވުންތެރިން، އެމީހުންގެ ދުވުން ސްޓްރާވާ އެޕް، ގާމިން ކަނެކްޓް، ރަންޓާސްޓިކް، ނައިކް ރަން ކްލަބް ނުވަތަ ރަންކީޕާ އެޕްލިކޭޝަން މެދުވެރިކޮށް ޓްރެކްކޮށް، ނިންމާފައިވާ ރަން ރޫޓްގެ ސްކީންޝޮޓް، ކޮންފާމޭޝަން މެސެޖާއިއެކު ލިބުނު ލިންކަށް އަޕްލޯޑް ކުރުމުން ޑިޖިޓަލް މެޑަލެއް ލިބޭނެ ކަމަށް އުރީދޫން ބުނެއެވެ.
ފިސިކަލް މެޑަލް ބޭނުންނަމަ ކުޑަ އަގަކާއެކު މޫލީ މެދުވެރިކޮށް އަޕްގްރޭޑްކޮށްލުމުން ރާއްޖޭގެ ކޮންމެ ހިސާބެއްގައި ހުރިނަމަވެސް ހިލޭ ޑެލިވާ ކޮށްދޭނެ ކަމަށް އުރީދޫން ބުނެއެވެ.
އުރީދޫ އަތޮޅު ދުވުމަކީ އެކަނިވިޔަސް އަދި އާއިލާއާ ރައްޓެހިންނާއެކުގައިވެސް، ގައިދުރުކަމާއިއެކު ބައިވެރިވެ މަޖާ ވަގުތުކޮޅެއް ހޭދަކޮށްލެވޭނެ އިވެންޓެއް ކަމަށް އުރީދޫން ބުނެއެވެ. އުރީދޫން ބުނީ މުޅި ރާއްޖެއާ ރާއްޖެއިން ބޭރުން ވެސް ބައިވެރިވުމަށް ހުޅުވާލާފައިވާ އެ ދުވުމަށް ޝައުގުވެރިވާ އެންމެހާ ފަރާތްތަކުން ބައިވެރިވުމަށް އުރީދޫއިން މަރުހަބާ ކިޔާ ކަމަށެވެ.
