ށ. ބިލެތްފަހި ބަނދަރު ތަރައްގީ ކުރުމުގެ މަޝްރޫއުގެ ދަށުން، އެއްގަމުތޮށި ލުމަށް ބޭނުންވާ ކޮންކްރީޓް ގާ އެތުރުމުގެ މަސައްކަތް ފަށާފައިވާ ކަމަށް އެމްޓީސީސީން ބުނެފިއެވެ.
އެމްޓީސީސީން ބުނީ އެ މަސައްކަތް ފަށާފައިވަނީ އިއްޔެ ކަމަށެވެ. އަދި އާ ހާބާ ބޭސިން ފުންކުރުމުގެ މަސައްކަތް މިހާރު ނިމިފައިވާ ކަމަށް ވެސް އެމްޓީސީސީން ބުނެއެވެ.
މި މަޝްރޫއުގެ ދަށުން ކުރުމަށް ހަމަޖެހިފައިވާ މަސައްކަތްތަކުގެ ތެރޭގައި، 40,576 ކިއުބިކް މީޓަރުގެ ސަރަހައްދެއްގެ ބަނދަރު ފުންކުރުމާއި 376 މީޓަރުގެ ސަރަހައްދެއްގައި ބޭރުތޮށި ލުން ހިމެނެއެވެ. އަދި 98 މީޓަރު އެއްގަމު ތޮށި ހެދުމާއި 5 މޫރިން ބުލޮކް ލުމާއި 11 ބަނދަރު ބައްތި ހަރުކުރުން ވެސް ހިމެނެއެވެ.
އޭގެ އިތުރުން 2 ނެރުބައްތި ހަރުކުރުމާއި 1150 ސްކެއާ މީޓަރު ޕޭވްމަންޓެއް ހެދުމާއި 14325 ކިއުބިކް މީޓަރު ބަނދަރު ފުންކުރުމާއި 9800 ކިއުބިކް މީޓަރު ނެރު ފުންކުރުމާރި ރޭމްޕެއް ހެދުމާއި އަދި 22 މީޓަރުގެ ގުރޯއިން ޖެހުން ވެސް މި މަޝްރޫއުގެ ދަށުން ހިމެނެއެވެ.
މިނިސްޓްރީ އޮފް ނޭޝަނަލް ޕްލޭނިން، ހައުސިން އެންޑް އިންފްރާސްޓްރަކްޗާގެ ފަރާތުން އެމްޓީސީސީއާ ހަވާލުކޮށްގެން ކުރިއަށް ގެންދާ މި މަޝްރޫއަކީ 31.6 މިލިއަން ރުފިޔާގެ މަޝްރޫއެކެވެ.
