އަންހެންކުދިން ހިތާނުކުރުމާ ގުޅޭ މައްސަލައަށް އިސްލާމިކް މިނިސްޓްރީއާއި ފަތުވާ މަޖިލީހުގެ ލަފާ ނުހޯދަން ނިންމައިފިއެވެ.
ރައްޔިތުން މަޖިލީހުގެ ހިއުމަން ރައިޓްސް އެންޑް ޖެންޑާ ކޮމިޓީން ކުރިން ނިންމާފައި އޮތީ މި މައްސަލައަށް އިސްލާމިކް މިނިސްޓްރީ އަދި ފަތުވާ މަޖިލީހުން ލަފާ ހޯދަން ކަމަށް ވިޔަސް މިއަދު ވަނީ ކުރިން ނިންމާފައިވާ ގޮތް ބަދަލުކޮށް އަލުން އެ މައްސަލަ މުރާޖައާ ކޮށްފައެވެ.
މަޖިލީހުގެ ހިއުމަން ރައިޓްސް އެންޑް ޖެންޑާ ކޮމިޓީން މިއަދު ބައްދަލުވުން ބާއްވާފައި ވަނީ އަންހެނުން ހިތާނުކުރުމަށް ތާއީދު ކުރައްވާ، ދީނީ އިލްމުވެރިޔާ ޑރ. މުހައްމަދު އިޔާޒް އަބްދުލްލަތީފް ވާހަކަ ދެއްކެވި ކަމަށް ބުނާ މައްސަލައެއް ކޮމިޓީއަށް ހުށައެޅުމުންނެވެ. އެ މައްސަލަ ބެލުމަށް މިއަދު ބޭއްވި ބައްދަލުވުމުގައި ހިންނަވަރު ދާއިރާގެ މެންބަރު ޖީހާން މަހުމޫދު ވިދާޅުވީ ރާއްޖޭގައި އަދިވެސް އަންހެނުން ހިތާނުކުރާ ކަމުގެ ކަންބޮޑުވުން ބައެއް ގައުމުތަކުން ފާހަގަ ކުރާ ކަމަށެވެ.
އަންހެން ކުދިން ހިތާނުކުރުމާ ގުޅުވާ މުޖުތަމައުގައި ދެކެވެމުން ދާ ވާހަކަތަކާ އެކު ކުރިމަތިވެފައި އޮތް މައްސަލައަށް ގާނޫނީ ހައްލެއް ގެނައުމަށް އައްޑޫ މީދޫ ދާއިރާގެ މެންބަރު ރޮޒައިނާ އެދިވަޑައިގެންފައި ވަނީ މިދިޔަ އަންގާރަ ދުވަހުއެވެ. އެގޮތުން މައްސަލަ އަށް ގާނޫނީ ހައްލެއް ގެނައުމަށްޓަކައި އިސްލާމިކް މިނިސްޓްރީއާއި، ފަތުވާ މަޖިލީހާއި، އެޗްއާރްސީއެމް އާއި ހެލްތު މިނިސްޓްރީގެ އިސް ބޭފުޅުންނާއި ބަންޑާރަނައިބް ކޮމިޓީ އަށް ހާޒިރުކޮށް ލަފާ ހޯދުމަށް ރޮޒައިނާ އެދުވަހު ހުށަހެޅުއްވިއެވެ.
ނަމަވެސް މިއަދު އެ ކޮމިޓީން ބޭއްވި ބައްދަލުވުމުގައި ނިންމާފައި ވަނީ މިނިސްޓްރީ އާއި ފަތުވާ މަޖިލިސް ގެ ބޭފުޅުން ކޮމިޓީއަށް ހާޒިރު ނުކުރުމަށެވެ. އަދި އެ ކޮމިޓީން ވަނީ އަންހެން ކުދިން ހިތާނު ކުރާ މައްސަލައިގައި ގާނޫނީ ފިޔަވަޅެއް އެޅުމަށް ބަންޑާރަނައިބުގެ އޮފީހުން ކުރަމުންދާ މަސައްކަތްތައް ބެލުމަށްވެސް ނިންމާފައެވެ.
ތިކަން ކުރާގޮތެއްވެސް އެބަ ބަލަންޖެހޭ