އިންޑިއާ އިން ރާއްޖެއަސް ގެންނަ ޓީޗަރުންގެ ވާހަކަ އަޑުގަދަކޮށް ދެކެވެމުންދާ މިދަނޑިވަޅުގައި ރާއްޖޭގައި އުޅޭ ބިދޭސީ ޓީޗަރުންތަކެއް ދިވެހި ބަހުން ލަވައެއް ކިޔާފައިވާ ވީޑިއޯއެއް ސޯޝަލް މިޑިއާގައި އާންމު ވެއްޖެއެވެ.
ސޯޝަލް މީޑިއާގައި ދައުރުވަމުންދާ މި ވިޑީއޯއިން ފެންނަނީ ބިދޭސީ 6 ޓީޗަރުން އެއް ސަފެއްގައި ތިބެ ލަވަކިޔައި، އެ ލަވައިގައި ކިޔާ ބަސްތަކާ ގުޅޭގޮތަށް ހަރަކާތް ކުރާ މަންޒަރެވެ. ބިދޭސީން ކިއި ލަވަޔަކީ ދިވެހިންގެ ތެރޭގައި ވަރަށް ކުރިންސުރެ މަޝްރޫ ލަވައެއް ކަމަށްވާ "އޭބަލަ ކޮއްކޯއޭ ކޮއްކޯއޭ ހީލަބަލާ" މި ލަވައެވެ.
އެ ލަވައިގެން ބައެއް ބައިބަޔަށް ބަދަލު ގެނެސްފައި ވާއިރު އެ ބިދޭސީން ހުށައެޅި ލަވައިގައި ކިޔަނީ "އޭބަލަ ބައްޕާއޭ، ބައްޕާއޭ ހީލަބަލާ" އެވެ. މިއީ ބައްޕައިންގެ ދުވަހަށް ހާއްސަކޮށް ކިޔާފައިވާ ލަވައެކެވެ. ބައްޕައިންގެ ދުވަސް ފާހަގަ ކޮށްފައި ވަނީ މި މަހުގެ 20 ވަނަ ދުވަހުއެވެ.
މި ވީޑިއޯ ޝެއާ ކުރި ފަރާތަކުން ބުނެފައި ވަނީ އެޑިއުކޭޝަނުން ގެންނަ އިންޑިއާ ޓީޗަރުންގެ ޓީމް ދިވެހި ބަހުގެ ތަމުރީނުތައް ފަށާފައިވާ ކަމަށެވެ. ރާއްޖެއަށް އަރަބި އަދި ގުރުއާން މާއްދާ ކިޔަވައި ދިނުމަށް އިންޑިއާ ޓީޗަރުން ގެންނާތީ އެކަމާ ގުޅުވާ މަޖާޒީ ގޮތަަކަށް އާންމު ކުރި މި ޕޯސްޓް އެތައް ބަޔަކު ދަނީ ޝެއާ ކޮށް ކޮމެންޓް ކުރަމުންނެވެ.
ރާއްޖޭގައި ދިވެހިން ލިޔެ ޗާޕްކޮށްފައިވާ ފޮތްތަކުން ކިޔަވައިދޭން އިންޑިޔާ ޓީޗަރުން ގެނައުމާ ގުޅިގެން އާންމުންގެ އެތައް ބަޔަކު އަންނަނީ ސަރުކާރަށް ފާޑުކިޔަމުންނެވެ. އިންޑިއާއިން ކޮންމެ ކަމެއް ކުރަން ވެސް މި ސަރުކާރުން މީހުން ގެންނަނީ އެ ގައުމުގެ ބަސް ދިރުވާ އާލާ ކުރަން ކަމަށް އެއް ބަޔަކު ބުނެއެވެ. އިންޑިއާގެ ސަގާފަތް ދިވެހިންގެ ތެރެއަށް މަސްހުނި ކުރަން އުޅެނީ ކަމަށް ވެސް ބައެއް މީހުން ބުނެއެވެ.
ދިވެހި ބަހުން އެއްޗެއް ބުނަން ނޭނގޭ އިންޑިއާގެ މުދައްރިސުންނަށް ފާޑުކިޔުންތައް އަމާޒުވެފައިވާ މި ދަނޑިވަޅުގައި ބިދޭސީ މުދައްރިސުންގެ މި ވީޑިއޯ އާންމު ވުމާއެކު އެމީހުންނަށް ވެސް ދިވެހި ބަސް ދަސްކުރެވޭނެ ކަމަށް ބައެއް މީހުން ގަބޫލު ކުރެއެެވެ.
މި ވީޑިއޯ އާންމު ކުރި އިރު މިއީ ކޮން ސްކޫލެއްގެ މުދަރިސުން ކަމެއް ހާމަކޮށްފައެއް ނުވެއެވެ.
