ހުޅުމާލެ މެޑިކަލް ފެސިލިޓީ(އެޗްއެމްއެފް)ގެ ހާލަތު ރަނގަޅުކަމަށާ، އެތަނުން ފާހަގަވީ ކަންކަން ހަރުދަނާކޮށްފައިވާކަމަށް ހިއުމަން ރައިޓްސް ކޮމިޝަން އޮފް މޯލްޑިވްސް (އެޗްއާރުސީއެމް) ގެ ކޮމިޝަނާ ޝިފާއަތު އަބްދުއްރައްޒާގު ވިދާޅުވެއްޖެއެވެ.
އެޗްއެމްއެފް ގައި އެނދުމަތިކޮށްފައިވާ ކޮވިޑް ބަލިމީހުންނަށް ދޭ ކެއުން ރަނގަޅު ނޫންކަމަށް މީގެ ކުރިން އެޗްއާރުސީއެމް އިން ބުނެފައިވެއެވެ. އަދި އެ ކޮމިޝަނުން އެޗްއެމްއެފް އަށް ކުރި ޒިޔާރަތުގައި އެތަނުގައި މަސައްކަތްކުރާ މުވައްޒަފުންނަށް ނަފްސާނީ އެތައް މައްސަލައެއް ކުރިމަތިވެފައިވާކަމަށްވެސް އެ ކޮމިޝަނުން ހާމަކުރެއެވެ.
އެޗްއެމްއެފްގައި ބަލިމީހުންނަށް ފަރުވާދެމުން ގެންދަނީ ނަރުހުން ކަމަށްވެފައި ދުވާލަކު އެތައް ބަލިމީހަކާ ކުރިމަތިލާން ނަރުހުންނަށް ޖެހިފައިވާއިރު، ބަލިމީހުންގެ ހާލަތު އާއިލާއަށް ފޯރުކޮށްދިނުމުގައި ލަސްތަކެއް ކުރިމަތިވާކަންވެސް އެޗްއަރުސީއެމް އިން ވަނީ ހާމަކޮށްފައެވެ.
ރޭ ރާއްޖެ ޓީވީން ގެނެސްދިން ފަލަސުރުހީ ޕްރޮގްރާމްގައި ވާހަކަދައްކަވަމުން ޝިފާއަތު ވިދާޅުވީ އެޗްއެމްއެފް އިން ފާހަގަވި ކަންކަން ވަނީ ހަރުދަނާ ކުރެވިފައިކަމަށާ، ކުރިއާ އަޅާ ބަލާއިރު އެތަނުން ފާހަގަވި ކަންކަން ވެސް ވަނީ ރަނގަޅުކުރެވިފަ ކަމަށެވެ. އަދި ކޮވިޑްއާ ގުޅިގެން އެނދުމަތިކޮށްގެން ފަރުވާ ހޯދަންޖެހޭ ފަރާތްތަކުން އެތަނަށް ދިއުމަށް ވަނީ އެ ކޮމިޝަނުން އިލްތިމާސްކޮށްފައެވެ.
ކޮވިޑް ބަލި ޖެހިގެން އެދުމަތިކޮށްގެން ފަރުވާ ދޭންޖެހޭ ފަރާތްތަކަށް ފަރުވާދެމުން ގެންދަނީ އެޗްއެމްއެފް ގައެވެ. އަދި ރާއްޖޭގައި ކޮވިޑް ބަލީގައި އެންމެ ގިނަ މީހުން މަރުވެފައިވަނީވެސް އެޗްއެމްއެފް ގައެވެ.
