މޭ 6 ގައި ރައީސް ނަޝީދަށް އަމާޒުކޮށް ދިން ޓެރަރިސްޓް ހަމަލާއާ ގުޅޭ ކަންކަން ބަލަމުންދާކަމަށާ އާންމު ރައްޔިތުންގެ އިތުބާރު ގެއްލޭ ގޮތަށް އެއްވެސް ފަރާތަކުން މައުލޫމާތު ނުފެތުރުމަށް ހިއުމަން ރައިޓްސް ކޮމިޝަން (އެޗްއާރުސީއެމް) އިން ބުނެފިއެވެ.
އެޗްއާރުސީއެމް އިން މިގޮތަށް ބުނެފައިވަނީ މޯލްޑިވިއަން ޑިމޮކްރެޓިކް ޕާޓީ (އެމްޑީޕީ) އިން ބޭއްވި އެ ޕާޓީގެ ގައުމީ މަޖިލިސް ޖަލްސާގައި "މޭ 6 ކޮމިޓީ" ގެ މަސައްކަތުގެ މައުލޫމާތު ގައުމީ މަޖިލީހަށް ހުށަހެޅުމުގެ ތެރެއިން "މޭ 6 ކޮމިޓީ" ގެ ޗެއާ އަދި ވިލުފުށީ ދާއިރާގެ މަޖިލިސް މެންބަރު ހަސަން އަފީފުގެ ވާހަކައިގައި، ރައީސް ނަޝީދަށް އަމާޒުކޮށް ދިން ޓެރަރިސްޓް ހަމަލާ އެ ކޮމިޝަނުން ކުށްވެރިކޮށްފައި ނުވާކަމަށް ވިދާޅުވުމުންނެވެ.
މެންބަރު އަފީފު އެމްޑީޕީގެ ގައުމީ މަޖިލީހުގައި ވާހަކަދައްކަވަމުން ވިދާޅުވެފައި ވަނީ އެޗްއާރުސީއެމް އިން ޓެރަރިސްޓް ހަމަލާއާ ގުޅިގެން ބަޔާނެއްވެސް އަދި އެ ހަމަލާ ކުށްވެރިކޮށްފައި ވެސް ނުވާ ކަމަށެވެ. އަދި މެންބަރު އަފީފު ވަނީ އެ ކޮމިޝަނުގެ ބޭފުޅުން މަސްއޫލިއްޔަތު އަދާކުރައްވާ ކަމާމެދު ސުވާލު އުފައްދާފައެވެ.
އެޗްއާރުސީއެމް އިން ނެރުނު ބަޔާނުގައި ވަނީ ރައީސް ނަޝީދަށް އަމާޒުކޮށް ހަމަލާ ދިން ރޭ އެމަނިކުފާނު އޭޑީކޭ ހޮސްޕިޓަލުގައި ފަރުވާ ހޯއްދަވަމުން ގެންދަވަނިކޮށް އެ ކޮމިޝަނުގެ މެންބަރެއް ހިމެނޭ ގޮތުން ހަާއްސަ ޓީމެއް ހޮސްޕިޓަލަށް ގޮސްފައިވާ ކަމަށެވެ. އަދި އެ ހަމަލާއާ ގުޅިގެން އެރޭގެ 23:30 އާ ހަމައަށްވެސް އެ ކޮމިޝަނުގެ ހާއްސަ ޓީމުން ހޮސްޕިޓަލުގައި ކަންކަން ބަލަމުން ދިޔަ ކަމަށްވެސް އެ ބަޔާނުގައި ވެއެވެ.
އެ ރޭ ދިން ހަމަލާ ކުށްވެރިކޮށް އެ ހާދިސާ ހިނގި ރޭގެ 22:05 ގައި އެ ކޮމިޝަނުން ޓްވީޓު ކޮށްފައިވާނެ ކަމަށާ އަދި އެރޭ 23:23 ގައި ހަމަލާއާ ގުޅިގެން އިތުރު ޓްވީޓެއްވެސް އެ ކޮމިޝަނުން ކޮށްފައިވާކަމަށް އެޗްއާރުސީއެމް އިން ބުނެއެވެ. އަދި މޭ 7، ވަނަ ދުވަހު 21:10 ގައި ހަމަލާއާ ގުޅޭ ނޫސް ބަޔާނެއްވެސް ޓްވިޓާ މެދުވެރިކޮށް އާންމުކޮށްފައި ވާނޭކަމަށްވެސް އެ ކޮމިޝަނުން ނެރުނު ބަޔާނުގައި ވެއެވެ.
އެޗްއާރުސީއެމް އިން ބުނީ މި ހަމަލާއާ ގުޅިގެން ދައުލަތުގެ ކަމާ ގުޅުންހުރި އިދާރާތަކުން އަމަލުކޮށްފައި ވާ އަދި ކުރަމުންދާ ގޮތްބަލައި، ތަހުގީގަށް ބޭނުންވާ މައުލޫމާތު ހޯދުމަށް ސިޓީ ކައުންސިލާ، ފުލުހުންނާ ހައުސިން މިނިސްޓްރީ އަދި އެމްއެންޑީއެފް އަށް އެދިފައިވާ ކަމަށާ އެމްއެންޑީއެފް ފިޔަވައި އެހެން ހުރިހާ މުއައްސަސާއަކުން ވެސް އެ ކޮމިޝަނުން އެދިފައިވާ މައުލޫމާތު ހިއްސާކޮށްފައި ވާކަމަށެވެ.
