މޭ 6، 2021 ވަނަ ދުވަހުގެ ރޭ ކުރީގެ ރައީސް އަދި ރައްޔިތުން މަޖިލީހުގެ ރައީސް މުހައްމަދު ނަޝީދަށް އަމާޒުކޮށް ދިން ޓެރަރިސްޓް ހަމަލާގެ ތަހުގީގު ހިނގަމުން ދާގޮތް ބަލަން ހާއްސަ ކޮމިޓީއެއް ހަދަން އެމްޑީޕީގެ ގައުމީ މަޖިލީހުން ފާސްކޮށްފިއެވެ.
ރޭ ގައުމީ މަޖިލީހަށް ހުށަހެޅި ގަރާރަކުން އެކަން ކޮށްފައި ވަނީ ގައުމީ މަޖިލީހުގެ ރޭގެ ޖަލްސާގައި ބައިވެރިވި 112 މެންބަރުންގެ ތެރެއިން 94 މެންބަރުން ވޯޓް ދީގެންނެވެ. އަދި 2 މެންބަރުން ވަކިގޮތަކަށް ވޯޓް ދީފައި ނުވާއިރު މި ގަރާރު ފާސް ކުރުމަށް ނޫނެކޭ ބުނެ 2 މެންބަރުން ވޯޓުދީފައި ވެއެވެ.
ރޭ ކުރިޔަށް ދިޔަ އެމްޑީޕީ ގައުމީ މަޖިލީހުގެ ކުއްލި ޖަލްސާއަށް ގަރާރު ހުށަހެޅުއްވީ އުނގޫފާރު ދާއިރާގެ އެމްޑީޕީ މެންބަރު މުހައްމަދު ވަހީދު (ވައްޑޭ) އެވެ.
މި ގަރާރު ބިނާކޮށްފައި އޮތީ މައިގަނޑު 3 ކަމެއްގެ މައްޗަށެވެ. އެއީ ސަރުކާރާ ތަހުގީގީ އިދާރާތަކުން ހިންގަމުންގެންދާ ތަހުގީގުތަކާ އެ ތަހުގީގާ ގުޅިގެން އަޅާ ފިޔަވަޅުތަކާއި ކުރަންޖެހޭ މަސައްކަތްތައް ހިނގާ ނުހިނގާ ގޮތް ޕާޓީގެ ފަރާތުން ބަލަމުން ގެންދިޔުމަށާ، ރައީސް ނަޝީދަށް ދިން ހަމަލާގެ ހަފަރާތް ނުހޯދިއްޖެނަމަ، އެޕާޓީ ދައުލަތެއްގެ ގޮތުގައި ދެކޭ ދިވެހި ދައުލަތުގެ ސިފަތައް ގެއްލިގެން ދާނެކަމުގެ ކަންބޮޑުވުން އޮތް ކަމަށް ބުނާ ބުނުމާއި، ރައީސް ނަޝީދަށް އިންސާފު ގާއިމު ކުރުމަށް މުޅި ރާއްޖޭގެ އެކިއެކި ކަންކޮޅުތަކުގައި އުޅޭ އެމްޑީޕީގެ މެންބަރުންނާއި ދިވެހި ރައްޔިތުން ކެނޑިނޭޅި ގޮވަމުން ދާކަމަށާއި އެ ޕާޓީގެ ފަރާތުން މިކަން ގާތުން ބަލާނެ ހާއްސަ ކޮމިޓީއެއް އުފެއްދުމާ ކޮމިޓީގެ މަސައްކަތްތަކުގެ މައުލޫމާތު ހާމަކުރުންމަތީ ތިބުމެވެ.
ރޭ ވައްޑޭ ހުށަހެޅުއްވި ގަރާތުގައި ހިމަނާފައި ވާ ކޮމިޓީއަކީ ރައީސް ނަޝީދުގެ ފަރާތްޕުޅުން ކަނޑައަޅުއްވާ މެމްބަރަކާއި، ރައްޔިތުންގެ މަޖިލީހުގެ ވިލުފުށީ ދާއިރާގެ މެމްބަރު ހަސަން އަފީފާއި، ފޮނަދޫ ދާއިރާގެ މެމްބަރު މޫސާ ސިރާޖާއި، ހެންވޭރު އުތުރު ދާއިރާގެ މެމްބަރު އިބްރާހީމް މުއިއްޒުގެ އިތުރުން ކުރީގެ ޑިފެންސް މިނިސްޓަރު އަމީން ފައިސަލްއެވެ.
ނަޝީދަށް ދިން ހަމަލާގެ ތަހުގީގު ދާ ގޮތް ބަލަން އެމްޑީޕީން ކޮމިޓީއެއް ހެދި އިރު، ރައީސް އޮފީހާއި، މަޖިލީހުގެ 241 ކޮމިޓީން ވެސް ދަނީ އެ ތަހުގީގުގެ ކަންކަން ބަލަމުންނެވެ. އަދި ފުލުހުން ގެންދަނީ އެ މައްސަލަ ތަހުގީގު ކުރަމުންނެވެ.
