ހަރުކަށި ފިކުރާ ދެކޮޅަށް ފުލުހުން ހިންގަމުންދާ އޮޕަރޭޝަންގެ ދަށުން އިތުރު 3 މީހަކު ހުޅުމާލެއިން ހައްޔަރުކޮށްފިއެވެ.
މައުލޫމާތު ލިބިފައިވާ ގޮތުގައި އެ ތިން މީހުންގެ ތެރެއިން 2 މީހަކު ހައްޔަރު ކޮށްފައި ވަނީ އިއްޔެ ހަވީރުއެވެ. އަދި އަނެއް މީހާ ހައްޔަރު ކޮށްފައި ވަނީ ރޭ ދަންވަރުއެވެ.
މި މީހުންނާ ގުޅިގެން އަދި ފުލުހުން މައުލޫމާތު ހިއްސާކޮށްފައި ނުވާއިރު އެ ތިން މީހުންނަކީވެސް ރައްޔިތުންގެ މަޖިލީހުގެ ރައީސް، ރައީސް މުހައްމަދު ނަޝީދަށް ދިން ޓެރަރިސްޓް ހަމަލާއާ ގުޅުން ހުރި ބައެއް ކަމެއް ނުވަތަ ނޫން ކަމެއް އަދި ސާފެއް ނުވެއެވެ.
ފުލުހުން ވަނީ މިމަހު 18 ވަނަ ދުވަހު ވެސް ހަރުކަށި ފިކުރު ފެތުރުމުގަައި އިސްކޮށް ހަރަކާތްތެރިވާ މީހެއް މާލެ އިން ހައްޔަރު ކޮށްފައެވެ. މީގެ އިތުރުން ވެސް ދާދި ފަހުން ވަނީ އައްޑޫން ވެސް ހަރުކަށި ފިކުރާ ގުޅުން ހުރި 7 މީހަކު ހައްޔަރު ކޮށްފައެވެ.
ރައީސް ނަޝީދަށް ދިން ހަމަލާ ފުލުހުން ތަހުގީގު ކުރަމުންދާއިރު މައްސަލައާ ގުޅިގެން މިހާތަނަށް ހަތަރު މީހަކު ވަނީ ފުލުހުން ހައްޔަރުކޮށްފައެވެ. އެއީ އަދުހަމް އަހުމަދު ރަޝީދު/ ވ. ތިނަދޫ، ހިޔާ، 25އ އާއި މުޖާޒް އަހްމަދު/ މއ. ފޭރުގެ، 21އ އާއި ތަހުމީން އަހްމަދު/ ގއ. ކޮނޑޭ، ފޮޅޭމާ، 32އ އާއި އަހްމަދު ފާތިހު/ ލ. ގަން، ދުންފިނިއުފާ، 23އ އެވެ.
