މިއަހަރު ނިމުމުގެ ކުރިން ރާއްޖޭގެ އިގްތިސާދު 22.7 ޕަސެންޓް ކުރިއަރާނެ ކަމަށް ލަފާކުރެވޭ ކަމަށް ފިނޭންސް މިނިސްޓާ އިބްރާހިމް އަމީރު ވިދާޅުވެއްޖެއެވެ.
އަމީރު އެހެން ވިދާޅުވީ މިހާރު ކުރިއަށް ދާ ނޫސްވެރިންގެ ބައްދަލުވުމުގައި ވާހަކަ ދައްކަވަމުންނެވެ.
އިގްތިސާދީ ކުރިއެރުމުގެ ދުވެލި މި އަހަރު 22.7 ޕަސެންޓްއަށް އަރާނެ ކަމުގައި މިހާރު ލަފާކުރެވޭ ސަބަބުތައް ކަމުގައި އަމީރު ފާހަގަކުރެއްވީ ފަތުރުވެރިކަން ރަނގަޅުވެ، ފަތުރުވެރިކަމުން ލިބޭ އާމްދަނީ އިތުރުވުމުގެ އިތުރަށް، ސަރުކާރުން ކޮވިޑް-19އާ ގުޅިގެން ތައާރަފު ކުރި އިކޮނޮމިކް ރިލީފު ޕެކޭޖުތަކާއި ދިން ލުއިތަކެވެ.
އެކަންކަމުގެ ސަބަބުން އިގްތިސާދީ ކުރިއެރުމުގެ ދުވެލި ހަލުވިވެފައި ވާކަން ފާހަގަ ކުރެއްވޭ ކަމަށް އަމީރު ވިދާޅުވިއެވެ.
އަމީރު ވިދާޅުވީ މިއަހަރު ރާއްޖޭގެ އިގްތިސާދަށް ބޮޑެތި ކުރިއެރުން ތަކެއް އަންނަމުންދާ ކަމަށެވެ. އެގޮތުން ކޮވިޑް-19 ގެ ކުރީގެ އިގުތިސާދަށް އަނބުރާ ރުޖޫއަ ވެވޭނީ 2022-2023 ހިސާބުގައި ކަމަށް ލަފާ ކުރެވޭ ކަމަށް އަމީރު ވިދާޅުވިއެވެ.
މިއަދުގެ ނޫސްވެރިންގެ ބައްދަލުވުމުގައި އަމީރު ވަނީ މި އަހަރުގެ މިހާތަނަށް ޓެކުހުން ލިބެމުން އަންނަ އާމްދަނީ އުންމީދު ކުރި ވަރަށް ވުރެ އިތުރު ކަމަށް ވެސް ފާހަގަ ކުރައްވާފައެވެ.
