ރަމަޟާން މަހު ފަހު10ގައި މާލޭ ސަރައްހަދުގެ 23 މިސްކިތެއްގައި ޖަމާޢަތުގައި ދަމު ނަމާދު ކުރުމަށް އިސްލާމިކް މިނިސްޓްރީން ހަމަޖައްސައިފިއެވެ.
މިނިސްޓްރީން ކުރި އިއުލާނެއްގައި ބުނީ މާލޭ ސަރަހައްދުގައި ދަމު ނަމާދުކުރުމަށް ހަމަޖެހިފައިވަނީ އިސްލާމީ މަރުކަޒުގެ އިތުރުން މާލޭގެ 15 މިސްކިތަކާއި ވިލިމާލޭގެ ތިން މިސްކިތަކާއި ހުޅުމާލޭގެ ފަސް މިސްކިތެކެވެ.
ދަމު ނަމާދު ކުރުމުގެ އިތުރުން ރަމަޟާން މަހުގެ ފަހު 10 ގައި އިއުތިކާފަށް ތިބުމުގެ އިންތިޒާމު ވެސް މިނިސްޓްރީން ވަނީ ހަމަޖައްސާފައެވެ.
އެގޮތުން މާލޭގެ 5 މިސްކިތަކާއި ހުޅުމާލެ ދެ މިސްކިތެއްގެ އިތުރުން ވިލިމާލޭގެ މިސްކިތެއްގައި އިއުތިކާފަށް ތިބެވޭނެކަމަށް މިނިސްޓްރީން ބުނެއެވެ.
މިދިޔަ މަހުގެ 1 ވަނަ ދުވަހު އިސްލާމިކް މިނިސްޓްރީން ވަނީ މާލެ ސަރަހައްދުގެ ހުރިހާ މިސްކިތެއްގައި ގައިދުރު ކަމާއެކު ޖަމާއަތުގައި ނަމާދު ކުރުން ހުއްޓުމަށް އަންގާފައެވެ.
އޭރު އެގޮތަށް ނިންމާފައި ވަނީ ކޮވިޑް ރާއްޖޭގައި ހަލުވިކަމާއެކު ފެތުރެމުން ދިއުމާއި، ހާލަތު އިތުރަށް ގޯސްވަމުން ދާކަމަށް ކަމާބެހޭ އިދާރާތަކުން މައުލޫމާތު ދީފައިވާތީ ފަތުވާ މަޖިލީހާއި ދީނީ އިލްމުވެރިންނާއި މަޝްވަރާކޮށް، އޭރުގެ ހާލަތަށް ރިއާޔަތްކޮށް، ރައްކާތެރިކަމުގެ ފިޔަވަޅެއްގެ ގޮތުން ކަމަށް އިސްލާމިކް މިނިސްޓްރީން ބުނެއެވެ.
އެހެން ނަމަވެސް އިސްލާމިކް މިނިސްޓްރީން ފަހުން ވަނީ އެނިންމުން ބަދަލުކޮށް ގައިދުރުކަމާ ނުލާ މިސްކިތްތަކުގައި ޖަމާޢަތް ހެދުމަށް ހުއްދަ ދީފައެވެ.
