ޔޫރަޕްގެ ބޮޑެތި 15 ކްލަބެއްގެ މެދުގައި އެކުލަވާލި 'ޔޫރަޕިއަން ސުޕާ ލީގު' ގައި ބައިވެރި ނުވާނެ ކަން އިނގިރޭސި ޕްރިމިއާ ލީގުގެ 'ގަދަ ހަ' ކްލަބުން ހާމަކޮށްފިއެވެ.
އިނގިރޭސި 'ގަދަ ހ' ޓީމުތަކުގެ ތެރޭގައި ހިމެނެނީ މެންޗެސްޓާ ސިޓީ، މެންޗެސްޓާ ޔުނައިޑެޓް، ލިވަޕޫލް، ޗެލްސީ، ޓޮޓެންހަމް އަދި އާސަނަލްއެވެ.
މި ޓީމުތަކުން ސުޕާ ލީގުން ވަކިވާ ކަން ހާމަކޮށްފައި މިވަނީ މިފަދަ މުބާރާތެއްގައި ބައިވެރިވުމާ ދެކޮޅަށް ފުޓްބޯޅަ ދުނިޔޭގެ ބޮޑެތި ޖަމާޢަތްތައް ކަމަށްވާ ފީފާ، ޔޫއެފްއާ އަދި ކުރީގެ ކުޅުންތެރިންނާއި ޕަންޑިޓުންގެ އިތުރުން މި ޓީމުތަކުގެ ސަޕޯޓަރުން ވެސް ނުރުހުން ފާޅުކޮށްފައިވާ ދަނޑިވަޅެއްގައެވެ.
އެފާރަތްތަކުން ބުނަނީ ކޮންމެ އަހަރަކު 15 ޓީމު އޮޓޯއިން ކުއަލިފައިވާ މުބާރާތެއްގެ ސަބަބުން ޔޫރަޕްގެ ވާދަވެރި ފުޓްބޯޅަ މުޅިން ނިމިގެންދާނެ ކަމަށާ ފައިސާގެ ދަހިވެތިކަމުގައި މި ކްލަބްތަކުން ފުޓްބޯޅައިގެ މުސްތަޤްބަލް ވިއްކާލައިފި ކަމަށެވެ.
ސުޕާ ލީގުގެ މައްސަލަ ހޫނުވެ އިނގިރޭސި ބޮޑު ވަޒީރު ޖޯންސަން ވެސް މިކަން ހުއްޓުވަން މަސައްކަތް ކުރައްވާނެ ކަމަށް ވިދާޅުވެފައި ވަނިކޮށް ޕްރިމިއާ ލީގު ޓީމުތަކުން ވަނީ މި ލީގުން ވަކިވިކަން ހާމަކޮށްފައެވެ.
މިލީގުން ވަކިވާނެ ކަން ފުރަތަމަ ހާމަކޮށްފައިވަނީ ޗެލްސީންނެވެ. އެހެން ނަމަވެސް އެކަން ރަސްމީކޮށް ކުރީ ސިޓީންނެވެ. އެއަށް ފަހު އާސަނަލް، ޔުނައިޑެޓް، ލިވަޕޫލް އަދި ޓޮޓެންހަމްއިން ވެސް ވަނީ ލީގުގައި ދެން ބައިވެރި ނުވާނެ ކަމަށް ބުނެފައެވެ.
މި ޓީމުތަކުގެ ނިންމުމަށް ޔޫއެފްއާގެ ރައީސް އެލެގްޒެންޑާ ކެފްރިން ވަނީ މަރުހަބާ ވިދާޅުވެފައެވެ. އަދި މި ހަ ކްލަބަކީ ވެސް ޔޫރަޕްގެ ފުޓްބޯޅައަށް ގިނަ ކަންކަން ކޮށްދެވޭނެ ކްލަބްތަކެއް ކަމަށް އޭނާ ވިދާޅުވިއެވެ.
މިޓީމުތަކުން ލީގުން ވަކިވިކަން ހާމަކުރުމުން ސުޕާ ލީގުން ނެރުނު ބަޔާނެއްގައި ބުނީ މި ނިންމުމަށް ފަހު މިި ލީގު ދެން ހިންގާނެ ގޮތަކާ މެދު އަލުން މަޝްވަރާތަކަށްދާނެ ކަމަށެވެ.
އިނގިރޭސި ހަ ޓީމުގެ އިތުރުން މިލީގުގައި ބައިވެރިވާނެ ކަން ހާމަކޮށްފައިވަނީ ސްޕެއިންގެ ރިއާލް މެޑްރިޑް، ބާސަލޯނާ އަދި އެތްލެޓިކޯ މެޑްރިޑްގެ އިތުރުން އިޓަލީގެ ޔުވެންޓަސް، އޭސީމިލާން އަދި އިންޓާ މިލާންއެވެ.
