އިންގްލިޝް ޕްރިމިއާ ލީގުގައި ތާވަލުގެ އެއްވަނައިގައި އޮތް މެންޗެސްޓާ ސިޓީއާއި ލީޑްސް ޔުނައިޑެޓް މިއަދު ވާދަކުރި މެޗު ލީޑްސްއިން ކާމިޔާބުކޮށްފިއެވެ.
މެޗުގެ ދެބައިކުޅަ އެއްބައި 10 ކުޅުންތެރިންނާއި އެކު ކުޅުނު ލީޑްސްއިން ލަނޑެއް ޖަހާ ލީޑު ނެގީ މެޗުގެ ފުރަތަމަ ހާފް ނިމެންދަނިކޮށެވެ. މިލަނޑު އެޓީމަށް ކާމިޔާބުކޮށް ދިނީ ސުޓުއާޓް ޑެލާސްއެވެ. އޭނގެ ކުޑައިރު ކޮޅެއް ކުރިން ސިޓީގެ ގެބްރިއަލް ހެސޫސްއަށް ކުރި ފައުލަކަށް ލީޑްސްގެ ކެޕްޓަން ލިއަމް ކޫޕާއަށް ވަނީ ސީދާ ރަތް ކާޑެއް ދައްކާފައެވެ.
މެޗުގެ ދެވަނަ ހާފްގައި ސިޓީގެ ކުޅުން ވަރުގަދަ ކުރި ނަމަވެސް ސްކޯ އެއްވަރު ކުރުމަށް އެޓީމަށް ލަނޑެއް ކާމިޔާބުކުރެވުނީ މެޗުގެ 76 ވަނަ މިނެޓްގައެވެ. މިލަނޑު އެޓީމަށް ކާމިޔާބުކޮށް ދިނީ ފެރަން ޓޮރޭސްއެވެ.
އެހެން ނަމަވެސް ލީޑްސްއިން ވަނީ ދެވަނަ ހާފްގެ އިތުރު ވަގުތުގައި ލަނޑެއް ޖަހާ 2-1 ގެ ނަތީޖާއަކުން ސިޓީގެ މައްޗަށް ކުރި ހޯދާފައެވެ. ލީޑްސް މިމެޗުން މޮޅުކޮށް ދިން ލަނޑު ޖެހީ ވެސް ސުޓުއާޓް ޑެލާސްއެވެ.
މިއީ މާޗް މަހުގެ 7 ވަނަ ދުވަހުގެ ފަހުން ސިޓީން މެޗަކުން ބަލިވި ފުރަތަމަ ފަހަރެވެ. އެހެން ނަމަވެސް އެޓީމު އަދި ވެސް ތާވަލުގެ ކުރީގައި 14 ޕޮއިންޓްގެ ލީޑެއް ނަގައިގެންނެވެ. އަދި ކުރިއަށް އޮތް މެޗުތަކުން 11 ޕޮއިންޓް ހޯދައިގެން ސިޓީއަށް މިސީޒަންގެ ލީގު ކަށަވަރުކުރެވޭނެއެވެ.
ސިޓީ ބަލިކުރި ލީޑްސް ވަނީ ތާވަލުގެ 9 ވަނަ އަށް ޖެހިލާފައެވެ، އެއީ ކުޅުނު 31 މެޗުން 45 ޕޮއިންޓް ހޯދައިގެންނެވެ.
