ރާއްޖޭގެ އެކި ކަންކޮޅުތަކުގައި ހުރި އެތައް މިލިއަން ޑޮލަރެއްގެ ރިސޯޓުތަކާއި ފަޅުރަށްތައް ޓެރަރިޒަމްގެ ނުރައްކަލުން ސަލާމަތް ކުރުމަށް، ކޯސްޓް ގާޑުގެ ސިފައިން ވަނީ ގިނަ މަސައްކަތްތަކެއް ކޮށްފައި ކަމަށް މިނިސްޓާ އޮފް ޑިފެންސް މާރިޔާ އަހްމަދު ދީދީ ވިދާޅުވެއްޖެއެވެ.
މާރިޔާ އެހެން ވިދާޅުވީ، 19 ވަނަ ކޯސްޓް ގާޑު ބޭސިކް ކޯސް ނިންމުމަށް ބުދަ ދުވަހު ސަދަން އޭރިޔާގެ ހެޑް ކުއާޓަރުގައި ބޭއްވި ރަސްމިއްޔާތުގައި ވަހަކަ ދައްކަވަމުންނެވެ. މާރިޔާ ވިދާޅުވީ، އޮތީ ކޮވިޑް-19 ޕެންޑެމިކްގެ ހާލަތު ނަމަވެސް ކޯސްޓް ގާޑު ސިފައިން އެތަންތަން ބެލެހެއްޓުމުގައި ފަސް ޖެހިފައި ނުވާ ކަމަށެވެ.
މާރިޔާގެ ވާހަކަގައި ވަނީ، ރާއްޖޭގެ 99.7 ޕަސަންޓަކީ ކަނޑުގެ ސަރަހައްދު ކަމަށް ވާއިރު، ދިވެހި ގައުމީ ދިފާއީ ބާރުގެ ކޯސްޓް ގާޑުގެ އެންމެ ބޮޑު މަސްއޫލިއްޔަތަކީ ރާއްޖޭގެ ކަނޑުތައް ބެލެހެއްޓުން ކަމަށާއި، މިއަދު ދުނިޔޭގެ "ތްރެޓް" މާހައުލަކީ އިއްޔެ ދުށް މާހައުލެއް ނޫން ކަމަށް މާރިޔާ ވިދާޅުވިއެވެ.
މާރިޔާ ވިދާޅުވީ، ދޭދޭ ގައުމުތަކުން ހަތިޔާރާއި ބާރުގެ ބޭނުންކޮށްގެން ފާޅުގައި ގައުމުތަކަށް އަރާ، އިސްތިއިމާރުކޮށް އުޅުނު، ޒަމާން މާޒީވެ ހިނގައްޖެ ކަމަށެވެ. އަދި އެފަދަ ފަރާތްތަކުގެ ބޭނުމަކީ ރައްޔިތުން ބިރުވެރި ކަމެއްގައި ބައިތިއްބައިގެން ޓެރަރިޒަމާއި ހަރުކަށި ފިކުރު ފަތުރާ، މިބަދަހި މުޖްތަމައުތައް ބައިބައި ކޮށްލުން ކަމަށާއި ޒަމާނުއްސުރެ މިޖަޒީރާ ރަށްތަކުގައި އުޅެމުން މިއައި އެކުވެރިކަމާއި އެއްބައިވަންތަކަން ނަގާލުމަށް ކަމަށް މާރިޔާ ވިދާޅުވިއެވެ.
ކޮވިޑް ޕެންޑެމިކާ ގުޅިގެން ރާއްޖެ ހިމެނޭ ހަލަބޮޅި އިންޑިއާ ކަނޑުގެ ސަރަހައްދަށް ކުރިމަތިވެފައިވާ އެންމެ ބޮޑު އެއް ނުރައްކާ ކަމަށްވާ މަސްތުވާތަކެތި ޓްރެފިކްކުރުން ވެސް އިތުރުވެފައިވާ ކަން ފާހަގަ ކުރައްވާ މާރިޔާ ވިދާޅުވީ، ދާދިފަހުން ނޮދަން އޭރިޔާއަށް ލެއްގި މަސްތުވާތަކެތި ވަގުތުން އަތުލާ އަމާނާތްތެރި ކަމާއެކު ކަމާބެހޭ ފަރާތްތަކާ ހަވާލުކުރެއްވި ކަން ވަނީ ފާހަގަ ކުރައްވާފައެވެ. އަދި މަސްތުވާތަކެތީގެ އިތުރުން އިންސާނީ ވަގުފާރިއާއި ކަނޑުފޭރުމާއި، މަސްކަނޑުތަކުން ވައްކަން ކުރުން ފަދަ ނުރައްކާތަކުން ވެސް މިގައުމު ސަލާމަތް ކުރަން އެންމެ ކުރީ ސަފަށް ނުކުމެ ތިބޭ ބަޔަކީ ކޯސްޓް ގާޑުގެ ސެއިލަރުން ކަމަށް މާރިޔާ ވިދާޅުވިއެވެ.
މިއަހަރުގެ އޭޕްރީލް 3 ގެ ނިޔަލަށް، ކޯސްޓް ގާޑުން ވަނީ ޖުމްލަ 73 ހާދިސާއެއްގައި 127 މީހެއްގެ ފުރާނަ ސަލާމަތް ކޮށްފައެވެ.
އެރަސްމިއްޔާތުގައި ޗީފް އޮފް ޑިފެންސް ފޯސް މޭޖާ ޖެނެރަލް އަބްދުﷲ ޝަމާލާއި ދިވެހި އަސްކަރިއްޔާއިން ދިފާއީ ވަޒީރަށް ކަނޑައަޅުއްވާ ހުންނަވާ މިލިޓަރީ ސެކްރެޓަރީ ބްރިގޭޑިއާ ޖެނެރަލް އަބްދުލް މަތީން އަހުމަދާއި ކޮމާންޑާސަދަން އޭރިޔާ ކާނަލް އިބްރާހިމް ރަޝީދާއި ކޯސްޓް ގާޑުގެ ކޮމަޑާންޓް ކާނަލް މުހައްމަދު ސަލީމްގެ އިތުރުން ސިފައިންގެ އިސް ބައެއް އޮފިސަރުން ބައިވެރިވެ ވަޑައިގެންނެވިއެވެ.
އެހެންތޯ ފިނދަނަ ތަކެއް ހެން ފިލީކީ ނޫންތޯ.....؟